Naýryz aıynda munaı baǵasyna qatysty ońtaıly ózgerister bolýy múmkin - Oljas Tóleýov
NUR-SULTAN. QazAqparat – Naýryz aıynda munaıdyń álemdik baǵasyna qatysty ońtaıly ózgerister bolyp qalady.
Bul jaıynda «Habar-24» telearnasynyń «Raqym Oshaqbaevpen dóńgelek ústel» baǵdarlamasyna suhbat bergen ekonomıst Oljas Tóleýov aıtty, dep habarlaıdy QazAqparat tilshisi.
Baǵdarlama barysynda R. Oshaqbaev sarapshylardan munaı baǵasynyń quldyraýy qanshalyqty uzaq bolatynyn surady.
Óz keziginde ekonomıst Oljas Tóleýov dál qazirgi ýaqytta birshama aıqyndalmaǵan jaǵdaılar bar ekenin aıtty.
«Málimde (munaıǵa qatysty) jasalǵannan beri az ýaqyt ótti. Qazirgi ýaqytta Reseı tarapynan qandaı da bir is-qımyldardy kútip otyrmyn. Óıtkeni búginde týyndaǵan jaǵdaı olarǵa tıimdi emes ekeni anyq. Atap aıtqanda, RF tarapy Saýd Arabııasy osyndaı úlken táýkelge baryp, osyndaı «baǵa soǵysyn» júrgizetinin kútpegen sııaqty. Reseı jáne Saýd Arabııasy ýáde berip otyrǵan barlyq is-qımyldar júzege asyrylǵan jaǵdaıdyń ózinde, bul qadamdar tek 1 sáýirden bastap atqarylatynyn túsiný kerek. Aldaǵy úsh aptanyń barysynda ahýaldy túzetýge tıisti ýaqyt bar dep oılaımyn», - dedi sarapshy.
Onyń sózine qaraǵanda, 18 naýryzda «OPEK+» tehnıkalyq komıtetiniń otyrysy ótedi, al 1 sáýirge deıin uıym aıasyndaǵy shart resmı kúshinde bolady.
«Meniń oıymsha, osy otyrys aıasynda atalǵan máseleler kóteriledi. Sáıkesinshe, aqylǵa qonymdy sheshim bolady dep úmittenemin», - dedi O. Tóleýov.
Eske sala keteıik, QR Úkimeti men QR Ulttyq banki munaıdyń álemdik naryqtaǵy jaǵdaıyna jáne makroekonomıkalyq turaqtylyqty qamtamasyz etý jónindegi sharalarǵa baılanysty birlesken málimdeme jasady.
«OPEK+ munaıdyń negizgi eksporttaýshy elderi arasyndaǵy munaı óndirýdi shekteý jónindegi kelispeýshilikter munaıdyń álemdik baǵasynyń aıtarlyqtaı tómendeýine alyp keldi. Búgin, 2020 jylǵy 9 naýryzda Brent markaly munaı álemdik naryqtarda 30% astamǵa tómendep, barreline 31-33 dollar kóleminde saýdalanýda. Osy jaǵdaıǵa baılanysty Úkimet pen Ulttyq bank júrgizilip jatqan memlekettik saıasattyń basymdyqtary makroekonomıkalyq turaqtylyqty jáne salyq-bıýdjet saıasatynyń tıimdiligin qamtamasyz etý, ınflıatsııalyq protsesterdi basqarý jáne eldegi áleýmettik turaqtylyqty saqtaý bolyp qalatynyn málimdeıdi», - delingen taratylǵan habarlamada.
