Naýryz aıynda elimizdegi kúnkóristiń eń tómengi deńgeıiniń shamasy 17 153 teńgeni qurady

Bul týraly Statıstıka agenttiginiń baspasóz qyzmetinen habarlandy.

Agenttik málimetterine qaraǵanda, aǵymdaǵy jylǵy naýryzda negizgi tamaq ónimderin tutynýdyń eń tómengi normalarynan eseptelgen orta eseppen halyqtyń jan basyna shaqqandaǵy kúnkóristiń eń tómengi deńgeıiniń shamasy ótken aımen salystyrǵanda 0,3 paıyzǵa, al 2012 jylǵy naýryzben salystyrǵanda 6,8 paıyzǵa ósken.

«Bunyń qurylymynda et pen balyqty satyp alýǵa jumsalǵan shyǵystardyń úlesi 23,5 paıyzdy, sút, maı jáne toń maı ónimderi men jumyrtqany - 16,3 paıyzdy, jemister men kókónisterdi - 10,4 paıyzdy, nan jáne jarma ónimderin - 7,7 paıyzdy, qant, shaı jáne dámdeýishterdi - 2,1 paıyzdy qurady», delingen baspasóz habarlamasynda.