Naýryz aıynda elimizdegi kúnkóristiń eń tómengi deńgeıi 19 016 teńgeni qurady
ASTANA. QazAqparat - 2015 jylǵy naýryzda kúnkóristiń eń tómengi deńgeıiniń shamasy 19 016 teńgeni qurady. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Negizgi tamaq ónimderin tutynýdyń eń tómengi normalarynan eseptelgen orta eseppen halyqtyń jan basyna shaqqandaǵy kúnkóristiń eń tómengi deńgeıiniń shamasy 2015 jylǵy naýryzda ótken aımen salystyrǵanda 0,2 paıyzǵa tómendese, 2014 jylǵy naýryzben salystyrǵanda 5,4 paıyzǵa ósti.
Statıstıka komıtetiniń málimetterine qaraǵanda, kúnkóris deńgeıiniń qurylymynda et pen balyqty satyp alýǵa jumsalǵan shyǵystardyń úlesi 22,1 paıyzdy, sút, maı jáne toń maı ónimderi men jumyrtqa - 17 paıyzdy quraǵan. Kúnkóris deńgeıiniń shamasynda jemister men kókónister úlesi 10,8 paıyzdy, nan jáne jarma ónimderi 8 paıyzdy, qant, shaı jáne dámdeýishter 2,1 paıyzdy qurady.
