Naýryz aıynda el turǵyndary 2900-ge jýyq altyn quıma satyp aldy
NUR-SULTAN. QazAqparat - 2021 jyldyń naýryz aıynda qazaqstandyqtar ekinshi deńgeıli bankter men jekelegen banktik emes aıyrbastaý pýnktterinen jalpy salmaǵy 48,2 kg 2 898 quıma satyp aldy, dep habarlaıdy QazAqparat QR Ulttyq bankiniń baspasóz qyzmetine silteme jasap.
Ulttyq Bank halyqqa tazartylǵan altyn quımalardy satý jáne satyp alý baǵdarlamasyn 2017 jyly qolǵa alǵan bolatyn. Baǵdarlama júzege asyryla bastaǵannan beri jalpy salmaǵy 1,79 tonna quraıtyn 50 200 altyn quıma satyldy.
Altyn quımalardyń bes túri usynylǵan: 5, 10, 20, 50 jáne 100 g. Tazartylǵan altyn quımalardy satý jáne satyp alý baǵdarlamasy iske asyrylǵaly halyq arasynda eń kóp suranysqa ıe bolǵany – 10 gramdyq quıma.
Jalpy satylymdaǵy onyń úlesi 30% – 15 184 dana. Odan keıin 20 gramdyq quıma – 10 976 dana (22%) jáne 100 gramdyq quıma – 10 964 dana (22%), 5 gramdyq quıma – 7 305 dana (15%), 50 gramdyq quıma – 5 771 dana (11%). Negizinen ólshengen quımalar Almaty, Nur-Sultan jáne Atyraý qalalarynda suranysqa ıe.
Altyn quımalar senimdi ınvestıtsııalyq qural bola alady. Bankter men banktik emes aıyrbastaý pýnktteriniń klıentke aqshasyn tólep, quımalardy «kúnbe-kún» satyp ala alatyn múmkindigi – altyn quımalar naryǵynyń ótimdiligin qamtamasyz etýde negizgi faktorǵa aınalyp otyr. Baǵdarlama iske qosylǵan ýaqyttan beri jalpy salmaǵy 3,75 kg ólshengen tek qana 141 quıma satyp alýǵa qabyldandy. Bul, árıne, altyn quımalardyń uzaq merzimdi ınvestıtsııalaý men jınaqtaý quraly bolyp tabylatynyna baılanysty.
Ár quıma qorǵanys elementterimen (quımalardyń aına beti, mıkrotekst jáne releftiń sheti), quımalardy mehanıkalyq zaqymdanýdan qorǵaıtyn jáne pakettiń ashylǵan-ashylmaǵanyn tekserýdi jeńildetetin arnaıy qaptamada shyǵarylady. Qorǵanys qaptamasy, sonymen qatar, quımanyń sapa sertıfıkaty bola alady. Sondyqtan quımany saqtaǵanda muqııat bolyp, oramany ashpaǵan jón.
Qazirgi ýaqytta altyn quımalardy Halyk Bank-te, Eýrazııalyq bankte, Jusan Bank-te, Bank TsentrKredıtte, sondaı-aq banktik emes aıyrbastaý pýnktterinde satyp alýǵa jáne satýǵa bolady.
