Naýryz aıynda bıdaı baǵasy 1,5% ósti
NUR-SULTAN. QazAqparat - Naýryz aıynyń qorytyndysy boıynsha Qazaqstanda bıdaı baǵasy 1,5%-ǵa ósti. Bir jyl ishinde ósim 20,1%-ǵa jetti. Jalpy, dándi daqyldar boıynsha baǵa ósimi 18,1%, al aýyl sharýashylyǵy ónimderi boıynsha 17% ǵana boldy, dep habarlaıdy QazAqparat Energyprom.kz saıtyna silteme jasap.
2021 jyldyń qorytyndysy boıynsha Qazaqstanda bıdaı egis kólemi 12,9 mln gektardy qurady, bul 2020 jylmen salystyrǵanda 6,2%-ǵa artyq. Egis kóleminiń ulǵaıýy ekinshi jyl qatarynan baıqalýda. Sonymen qatar, egistik kóleminiń ósýine qaramastan, 2021 jyly jalpy bıdaı túsimi birden 17,1%-ǵa, ıaǵnı 11,8 mln tonnaǵa deıin qysqardy.
Saladaǵy eksportqa keletin bolsaq, ol da jalpy ónim kóleminiń qysqarýyna qaramastan ósti: 2021 jyly – 10,3%-ǵa, 5,8 mln tonnaǵa deıin (jáne 1,4 mlrd AQSh dollary). Aǵymdaǵy jyldyń qańtar aıynda Qazaqstan Respýblıkasynan syrtqy naryqqa 599,8 myń tonna bıdaı men meslın jetkizildi, bul bir jyl burynǵydan 45,5 paıyzǵa artyq. Aqshalaı eseptegende ósim odan da joǵary boldy – birden 87,2%-ǵa, 177 mln AQSh dollaryna deıin.
Atap aıtqanda, TMD elderine eksporttyq jetkizilim baǵasy 21,8%-ǵa, álem boıynsha 10,8%-ǵa ósti. Importqa keletin bolsaq, bul salada Reseı engizgen dándi daqyldardy eksporttaýǵa ýaqytsha tyıym salýǵa baılanysty kólemniń azaıýyn kútýge bolady. Tıisinshe, bizdiń naryqqa reseılik astyqtyń aǵyny da azaıýy kerek.
Naýryz aıynyń qorytyndysy boıynsha bıdaıdyń aýyl sharýashylyǵy ónimderin óndirýshi baǵasynyń kúrt ósýi baıqalmady: ázirge aıyna +1,5%. Alaıda, bir jyl ishinde bul kórsetkish aıtarlyqtaı 20,1%-ǵa ósti. Jalpy, dándi daqyldar boıynsha baǵa ósimi 18,1%, al jalpy aýyl sharýashylyǵy ónimderi boıynsha 17% ǵana boldy.
