Naýryz aıynda Astanada Kóz aýrýlary qazaq ǵylymı-zertteý ınstıtýty fılıalynyń jańa ǵımaraty ashylady
Kóz aýrýlary qazaq ǵylymı-zertteý ınstıtýty - 80 jyldyq tarıhy bar elimizdiń bas oftalmologııalyq ortalyǵy. Instıtýttyń elordadaǵy fılıaly 4 jyldan beri Soltústik Qazaqstan, Shyǵys Qazaqstan, Qaraǵandy, Aqmola, Qostanaı, Aqtóbe, Pavlodar oblystary men Astana qalasy turǵyndaryn tegin medıtsınalyq kómektiń kepildik berilgen kólemi sheńberinde joǵary mamandandyrylǵan oftalmologııalyq kómekpen qamtamasyz etýde. Fılıal shala týylǵan nárestelerdiń kóz aýrýlaryn emdeýde jáne skrınıng júrgizýde qalalyq perınataldyq ortalyqpen yntymaqtasa jumys isteıdi.
Aýdany 3200 sharshy metr bolatyn jańa ǵımaratqa kóshý oftalmologııalyq emdeý-dıagnostıkalaý qyzmetterin keńeıtýge, sondaı-aq, shel hırýrgııasy jáne kóz janaryn túzetý sııaqty salalarda eń ozyq tehnologııalardy endirýge múmkindik beredi. Astanadaǵy fılıalǵa 400 mln. teńgeniń zamanaýı qondyrǵylary satyp alyndy.
Kóz aýrýlary qazaq ǵylymı-zertteý ınstıtýty fılıalynyń quramyna eresekter men balalar bólimi, kúndizgi statsıonar, dıagnostıkalyq-konsýltatıvtik bólim, lazerlik ortalyq, oftalmologtardy oqytý zerthanasy kiredi.
Dúnıejúzilik densaýlyq saqtaý uıymynyń málimetinshe, álemde 285 mln. adam kóz aýrýlaryna shaldyqqan, olardyń ishinde 39 mln. zaǵıp jan bar. Qazaqstanda kóz aýrýlary boıynsha 56 myń múgedek tirkelgen.