Naýryz aıy bastalǵaly teńge 0,8 paıyzǵa álsiredi

NUR-SULTAN. QazAqparat – Naýryz aıynyń basynan teńge 0,8 paıyzǵa álsiredi. Bul týraly búgin Úkimet otyrysynda QR Ulttyq bank tóraǵasy Erbolat Dosaev aıtty , dep habarlaıdy QazAqparat tilshisi.

«Bıylǵy aqpanda munaı baǵasy OPEK+ elderiniń shıkizat óndirýdi qysqartýy, AQSh-taǵy temperatýranyń óte tómen bolýy, álemde Covid-19 aýrýynyń tómendeýi nátıjesinde jyldyq rekordtan asyp tústi», - dedi 2021 jyldyń qańtar-aqpanyndaǵy elimizdiń áleýmettik-ekonomıkalyq damý qorytyndysy jaıynda baıandaǵan ol.

Onyń atap ótýinshe, rekordtyq mánge jetken Qazaqstannyń memlekettik baǵaly qaǵazdar naryǵyna sheteldik kapıtaldyń ákelinýimen qatar respýblıkalyq bıýdjetke transfertter bólý aıasynda Ulttyq qor aktıvterin konvertatsııalaý, kvazımemlekettik sektor kompanııalarynyń eksporttyq valıýta túsiminiń bir bóligin satý, sondaı-aq kompanııalardyń toqsandyq salyq tólemderi esebinen aqpanda ulttyq valıýta aıyrbastaý baǵamynyń bir AQSh dollary úshin 417,09 teńgege deıin 1,7 paıyzǵa nyǵaıýyna yqpal etti.

«10 naýryzda teńge baǵamy salyqtyq kezeńniń aıaqtalýy, sanktsııalyq rıtorıkanyń kúsheıýi saldarynan negizgi saýda áriptesi valıýtasynyń álsireýi aıasynda aıdyń basynan beri 0,8 paıyzǵa álsirep, bir AQSh dollary úshin 420,58 teńgeni qurady», - dedi Erbolat Dosaev.