NAÝRYZ: «Astana Opera» teatrynda mımans ártisteri qazaqtyń salt-dástúrlerinen kórinister qoıady

ASTANA. QazAqparat - Kóktemgi Naýryz merekesi qarsańynda, 19 naýryzda «Astana Opera» teatrynyń kameralyq zalynda teatrdyń jetekshi solısteri men kameralyq horynyń qatysýymen «Naýryz-Kóktem» atty ánnen shashý shashatyn kontsert ótedi. Kameralyq zaldyń kontsertine alǵash ret Ǵalııa Baıǵazınovanyń basshylyq etýimen mımans trýppasynyń ártisteri qatysady. Bul týraly teatrdyń baspasóz qyzmetinen habarlady.

Baǵdarlamasy qyzyqty ári alýan-túrli keshte júrekke jaqyn qazaq halyq ánderi, romanstary men sazdary, Qazaqstan kompozıtorlarynyń operasynan kórinister shyrqalady. Kópshilik súıip tyńdaıtyn «Jar-Jar», «Toıbastar», ásem qus - aqqýdy beıneleıtin «Gákký» áni jáne basqa kompozıtsııalar ulttyq operalyq klassıkany baǵalaýshylar men súıer qaýymdy qýantatyny sózsiz. Ulttyq mereke ádet-ǵurypsyz ótpeıdi. Kontsert barysynda qazaqtyń asyl qazynasy -salt-dástúrin túgeldeı kórsetý múmkin bolmasa da, Toı bastar, otaý qurý, jan tebirentetin názik saltymyz - besikke bóleýden kórinister qoıylady. Kóshpendi qazaq tazalyqty ustanyp, dúnıege kelgen sábıdi besikke bólegen. Osy ádet-ǵurypty mımans ártisteri kórsetedi. Keshke qatysatyndardyń barlyǵy, kontsertmeıster de ulttyq kıim kıedi. Kameralyq zaldyń akademııalyq sahnasy ulttyq naqyshta bezendirilip, kórermen kıiz úıdiń ıntererin tamashalaı alady. Mýzykatanýshy Jákenova Marjan Naýryz-Kóktem kontserti tyńdarmanǵa kóktem, jaratylystyń jańarýyn, kóterińki kóńil-kúı syılaıtynyn aıtady. «Kontsertke «Astana Opera» teatrynyń jetekshi solısteri: Dına Hamzına, Aızada Qaponova, Jannat Baqtaı, Álfııa Kárimova, Gúlzat Dáýirbaeva, Ǵalııa Baıǵazınova, Jámılıa Jarqymbaeva, Beıimbet Tańaryqov, Azamat Jyltyrkózov jáne basqalary qatysady. Kesh kórermenniń júregine jetetin, olarǵa naǵyz mereke syılaıtyn mazmundy bolǵaly tur», - deıdi Marjan Jákenova. Kontsert saǵat 19:30, bılet baǵasy 1 500 teńgeni quraıdy.