Naýryz-2023: Astananyń qaı jerlerinde merekelik sharalar ótedi
Elordada Naýryz merekesine oraı júzden astam shara ótedi. Qalanyń 4 aýdanynda Naýryz meıramy atalyp ótetin 23 oryn anyqtaldy. Turǵyndar men astana qonaqtary kontsertterge, merekelik baǵdarlamalarǵa, qoıylymdarǵa, ulttyq sport túrleri boıynsha jarystarǵa qatysa alady.
«21-23 naýryz kúnderi barlyq aýdanda, sonyń ishinde elordanyń eldi mekenderinde «Naýryz Dýman» mádenı-buqaralyq sharalary uıymdastyrylady. Іs-sharada vedomstvolyq baǵynysty uıymdar men shyǵarmashylyq ujymdardyń qatysýymen kontserttik baǵdarlamalar, túrli kostıým kıgen keıipkerler men qýyrshaqtar shoýy qarastyrylǵan. Sondaı-aq, jınalǵan jurt ulttyq sport túrleri boıynsha jarystarǵa qatysa alady», - dedi Nuran Qamzın elordalyq Kommýnıkatsııalar qyzmetinde.
Onyń aıtýynsha, 21 naýryz kúni saǵat 13:00-18:00 aralyǵynda, 22 naýryz kúni 11:00-18:00 deıin, 23 naýryz kúnderi – EXPO kórme kesheni aýmaǵynda Kóshpeliler órkenıetiniń aýqymdy festıvali uıymdastyrylady. Festıval aıasynda qazaq kúresi, arqan tartys, gir kóterý sııaqty ulttyq sport túrlerinen jarystar ótedi.
Tól ulttyq mádenıet pen dástúr atmosferasyn seziný maqsatynda aýqymdy etnoaýyldyń ashylýy, qolónershiler jármeńkeleri, ulttyq taǵamdar festıvali jáne basqa sharalar josparlanyp otyr.
Osy kúnderi EXPO halyqaralyq kórmesi ortalyǵynda merekelik is-sharanyń tujyrymdamasyna sáıkes, otandyq qolónershilerdiń qatysýymen «Naýryz bazary» jármeńkesi ótedi. «Naýryz bazary» shyǵys jármeńkesinde etnostıldegi buıymdardyń – keramıka, metall, kıiz jáne jibekten jasalǵan zattardyń, kádesyılardyń jańa toptamalary usynylady.
Elimizdiń ár óńirinen kelgen eń jaqsy sharýa qojalyqtary men taýar óndirýshilerdiń jańa ónimderi tıimdi baǵamen qoljetimdi bolady. Mereke qurmetine barlyq taýarlarǵa úlken jeńildikter josparlanyp otyr.
21-23 naýryz aralyǵynda ár aýdanda eki negizgi alań – barlyǵy 8 oryn anyqtaldy. Onda mádenıet basqarmasynyń jetekshiligimen jappaı merekeleý men kontserttik baǵdarlamalar uıymdastyrylady. Qalǵan oryndar elordanyń aýdandyq ákimdikteriniń apparattyq esebinen qamtamasyz etiledi.
Almaty aýdany boıynsha – «Qazaq eli» monýmenti alańy, «Jeleznodorojnyı» turǵyn alaby, «Jeruıyq» saıabaǵy, «Kúıshiler alleıasy», «Internatsıonalnyı» jáne «Mıchýrıno» turǵyn alabynda ótedi.
Esil aýdanynda – EXPO kórme kesheni, «Báıterek» monýmenti jáne «Prıgorodnyı», «Arnaý», «Zelenyı kvartal» turǵyn alaptarynda, «Jaǵalaý» skverinde, «Nazarbaev» ortalyǵynda ótedi.
Saryarqa aýdany boıynsha – qalalyq alańda, «Kóktal» saıabaǵy, «Qorǵaljyń» saıabaǵy, «Agrogorodok» turǵyn alabynda ótedi.
Baıqońyr aýdany boıynsha – «Atatúrik» saıabaǵy, «Jazýshylar» alleıasy, «Kırpıchnyı», «Kazgorodok», «Óndiris» turǵyn alaptarynda ótedi.
16-18 naýryz kúnderi saǵat 10:00-18:00 aralyǵynda S. Seıfýllın mýzeıinde «Qosh keldiń, áz Naýryz» kórmesi uıymdastyrylady.
17 naýryz kúni saǵat 19:30-da Jastar saraıynda «Naýryz Dýman» atty kontsert ótedi.
20 naýryzda Memlekettik akademııalyq fılarmonııada mádenıet salasyndaǵy «Naýryz» ulttyq syılyǵy tabystalady.
21 naýryzda Qazaqstan ortalyq kontsert zalynda Shámshi Qaldaıaqovtyń shyǵarmashylyǵyna arnalǵan «Ánim sen ediń» merekelik kontserti josparlanǵan.
23 naýryz kúni saǵat 17:00-de Jastar saraıynda Naýryzǵa arnalǵan merekelik baǵdarlama – «Magııa stepı» atty ıllıýzııa jáne mýzyka shoýy ótedi.
24 naýryzda Qazaqstan ortalyq kontsert zalynda QR halyq ártisi Altynbek Qorazbaevtyń 75 jyldyq mereıtoıyna arnalǵan shyǵarmashylyq kesh ótedi.
Astana qalasynyń teatrlary da bul merekede qalys qalmaı, jańa premeralar usynady. Sonymen qatar, 18-26 naýryz aralyǵynda Qýyrshaq teatry «Naýryz Dýman» atty adam boıyndaı qýyrshaqtar shoýyn usynady. Qalanyń ortalyqtandyrylǵan kitaphanalar júıesi de merekeden tys qalmaı, kún saıyn Naýryz meıramyna oraı is-sharalar ótkizýdi bastady. Barlyq sharalar boıynsha aqparatty Mádenıet basqarmasynan nemese Tıketon.kz saıtynan alýǵa bolady», - dedi N. Qamzın.
