«Naýryz-2022» ulttyq syılyǵy úmitkerlerine daýys berý bastaldy

NUR-SULTAN. QazAqparat - «Qazaqstan» respýblıkalyq teleradıokorporatsııasy Nur-Sultan qalasy ákimdigimen birlesip, ulttyq qundylyqtardyń nasıhattalýy men damýyna eleýli úles qosyp júrgen jandar arasynda «Naýryz-2022» ulttyq syılyǵyna baıqaý jarııalady, dep habarlaıdy QazAqparat tilshisi.

Elimizde bıyl ekinshi ret uıymdastyrylyp otyrǵan joba ulttyq mádenıet pen rýhanııat, ulttyq óner jáne ulttyq sport ókilderi arasynda ótkiziledi.

Baıqaý jeńimpazdary bıyl «Úzdik aıtysker», «Úzdik kúıshi», «Úzdik ánshi», «Úzdik jyrshy», «Úzdik zerger», «Úzdik sheber», «Úzdik toqyma sheberi», «Úzdik ulttyq sport sheberi» atalymdary boıynsha anyqtalady.

Jobaǵa 8 atalym boıynsha barlyǵy 114 úmitker qatysýda. Olardyń arasynda aıtysker aqyn Bekarys Shoıbekov, Erkebulan Qaınazar, Muhtar Nııazov, kúıshi Aıgúl Úlkenbaeva, Aıtolqyn Toqtaǵan, Asylbek Eńsepov, dástúrli ánshi Erlan Rysqalı, Klara Tólenbaeva, Aıgúl Qosanova, Erkin Shúkiman, jyrshy Aıgúl Elshibaeva, Elmura Jańabergen, Kúnsulý Túrikpen, zerger Ótepqalı Ómirov, Serikqalı Kókenov, Tólepbergen Sarmanbekov, qolóner sheberleri, ejelgi ustalyq ónerdi jalastyrýshylar Dáýlet Dárkembaıuly, Úmbetovter otbasy, Azat Úzenbaev, Baqyt Keńshilik jáne kókpar, aýdaryspaq, teńge ilý, jamby atý, toǵyzqumalaq sııaqty ulttyq sport túrleriniń sheberleri bar.

Baıqaý qatysýshylaryna daýys berý 2022 jylǵy 13 naýryzǵa deıin «Qazaqstan» telearnasynyń resmı saıtynda júrgiziledi.

Jeńimpaz (ár atalym boıynsha 1 úmitker) «Taıqazan» estelik statýetkasy jáne 500 myń teńge aqshalaı syılyqpen marapattalady.