«Naýryznamanyń» onkúndigi: Astanada «Shańyraq kúni» qandaı is-sharalar ótedi

Bul kúni Baıqońyr aýdanynyń aýmaǵynda mereıtoıyn atap ótip jatqan otbasylarǵa (birge ómir súrgenderine 45, 50, 55 jyl tolǵan) saltanatty quttyqtaýlar uıymdastyrylady.

Ortalyqtandyrylǵan kitaphana júıesiniń fılıaldarynda kitap kórmeleri ótedi. Al Óner mýzeıinde oqýshylarǵa arnalǵan ekskýrsııalar uıymdastyrylady.

17 naýryz kúni saǵat 10:00-de L.N. Gýmılev atyndaǵy Eýrazııa ulttyq ýnıversıtetinde Astana qalasynyń Jastar saıasaty máseleleri basqarmasynyń qoldaýymen «Kóńildi starttar – 2026» atty otbasylyq estafeta ótedi. Іs-sharanyń maqsaty – otbasylyq qundylyqtardy nasıhattaý, ónegeli urpaq tárbıelep otyrǵan úlgili otbasylardy yntalandyrý, sondaı-aq urpaqtar sabaqtastyǵyn nyǵaıtý. Estafeta baǵdarlamasy eki kezeńnen turady jáne ulttyq oıyn elementterin qamtıdy.

Shańyraq kúni Astanada kópbalaly analar da marapattalady. Saryarqa aýdanynda bala tárbıesine jáne otbasylyq qundylyqtardy nyǵaıtýǵa eleýli úles qosqan kópbalaly analarǵa «Kúmis alqa» jáne «Altyn alqa» tósbelgilerin tabystaý saltanatty rásimi ótedi. Marapattaý rásimi saǵat 11:00-de Saryarqa dańǵyly, 13 mekenjaıynda bastalady.

Sondaı-aq 17 naýryz kúni saǵat 15:00-de Saryarqa dańǵyly, 13 mekenjaıyndaǵy Saryarqa aýdany ákimdiginiń ǵımaratynda «Astana jastary» jastar resýrstyq ortalyǵy Astana qalasynyń Jastar saıasaty máseleleri basqarmasymen birlesip, saltanatty is-shara uıymdastyrady. Onyń aıasynda jas jubaılar men uzaq jyl birge ómir súrip kele jatqan juptar sımvolıkalyq túrde neke qııý rásiminen qaıta ótedi.

17 naýryz kúni saǵat 16:30-da Kenesary kóshesi, 9 mekenjaıyndaǵy «Órleý» ortalyǵynda erekshe qajettilikteri bar balalarǵa arnalǵan «Tusaýkeser» rásimi ótkiziledi. Іs-sharaǵa Saryarqa aýdanynyń ákimi qatysady.

Shańyraq kúni Astanada kópbalaly analardy marapattaý rásimi Esil jáne Saryarqa aýdandarynda da ótedi. Onda bala tárbıesine jáne otbasylyq qundylyqtardy nyǵaıtýǵa eleýli úles qosqan analarǵa «Kúmis alqa» men «Altyn alqa» tósbelgileri tabystalady.

Osy kúni Mýzykalyq jas kórermen teatrynda «Baqytty shańyraq jyry» taqyrybynda shyǵarmashylyqpen aınalysatyn jas otbasylarmen kezdesý ótedi. Іs-shara 17 naýryz kúni keshki saǵat 18:30-da bastalady. Teatr ujymynda bir-birimen shańyraq kóterip, otbasyn qurǵan 19 jup bar. Kezdesý barysynda ánder shyrqalyp, jas otbasylar óz ónerlerin kórsetedi, aq tilekter men batalar aıtylady.

Sonymen qatar bul kúni ulttyq qundylyqtardy nasıhattaýǵa baǵyttalǵan aýqymdy mádenı-sporttyq is-shara ótedi. Onyń aıasynda «Altyn saqa» fleshmoby men asyq oıyny uıymdastyrylady.

Іs-shara tsıfrlandyrý jyly aıasynda jasandy ıntellekt elementterin qoldaný arqyly ótkiziledi. Ony Aıdar dep atalatyn jasandy ıntellekt júrgizedi. Ulttyq oıynǵa arnalǵan mádenı-sporttyq baǵdarlamaǵa barlyǵy 3000 bala qatysady. Arnaıy qoıylym arqyly qatysýshylar «alshy» túsken asyqtyń pishinin jáne «Altyn saqa» sózderin beınelep, qatarǵa turady.

Mýzykalyq kompozıtsııa oryndalǵan kezde balalar fleshmobtyń kórkemdik ıdeıasyn ashatyn túrli bı qımyldaryn oryndaıdy. Fleshmob aıaqtalǵannan keıin jasandy ıntellekt qaladaǵy barlyq bilim berý uıymynda – balabaqshalar men mektepterde asyq oıynynyń bastalǵanyn resmı túrde jarııalaıdy. Osy belgi boıynsha 15 000-nan astam bala bir mezette ulttyq oıynǵa qatysady.

Osy kúni saǵat 12:30-da qala kolledjderiniń stýdentterine arnalǵan jataqhananyń ashylý rásimi ótedi.