Naýryznama: Mańǵystaýda jyl basy Naýryz erekshe aýqymda toılanyp jatyr
AQTAÝ. KAZINFORM - Naýryz merekesine oraı 22 naýryzda Amfıteatr alańynda 27 dástúrli qazaq kıiz úıi tigildi.
Amfıteatr sahnasynda qala qonaqtaryna 300-den astam adam óner kórsetetin «Naýsha Naýryz – baq, yrystyń bastaýy» atty teatrlandyrylǵan qoıylym usynyldy. Jaǵalaýda at pen túıe mingen shabandozdar jáne qazaqtyń tazy tuqymdy ıtterin jetektep, búrkit baýlaǵar búrkitshilerdiń sherýi ótti.
Bıyl Mańǵystaýda uıymdastyrylǵan «Kórpe Fest – 2024» qolónershiler festıvali Naýryz merekesiniń aıryqsha ereksheligi bolyp otyr. Naýryzdy toılaý aıasynda Aqtaý jaǵalaýynda quraq quraıtyn 15-ke jýyq áıel jınalyp, kórpe, jamylǵy, jastyq sııaqty ózderiniń erekshe ónimderin usyndy.
«Kórpe Fest-2024» qoldanbaly óner sheberlerin qoldaý maqsatynda ótkiziledi. Sonyń arqasynda qazaq oıý-órnegi urpaqtan-urpaqqa dáripteledi. Kórpe tigý degenimiz halyq arasynda qurmetke ıe qoldanbaly ónerdiń erekshe túri. Bul bizdiń rýhanı jan-dúnıemizben tikeleı baılanysty ǵasyrlar boıǵy tarıhymyzdy kórsetedi. Festıvalge qatysýshylar óz sheberlikterin odan ári jetildirip, jańa zamanaýı órnekterdi paıdalana otyryp, halyqtyń qolónerin damytyp, halyqtyń shyǵarmashylyǵyndaǵy osy ónerdiń beriktigi men óshpeıtinine yqpal etedi dep senemin», - dedi festıval uıymdastyrýshysy, Mańǵystaý oblysynyń otbasylyq-demagrafııalyq saıasat jónindegi oblystyq komıssııasynyń múshesi, oblystyq Analar keńesiniń múshesi Tilektes Bolatbaeva.
Óńirdiń turǵyndary men qonaqtary úshin QR Sýretshiler Odaǵynyń Mańǵystaý oblystyq fılıaly oblystyq sýretshiler kórmesin uıymdastyryp jatyr. Atalǵan sharaǵa 35 qylqalam sheberiniń týyndylary qoıylǵan.
Óz kezeginde óńir basshysy Nurlan Noǵaev oblys turǵyndary men qonaqtaryn Naýryz meıramynyń bastalýymen quttyqtap, bıylǵy jyly mereke jańa formatqa ıe bolǵanyn atady.
«Memleket basshysy Qasym-Jomart Kemeluly Ulttyq quryltaı otyrysynda sóılegen sózinde tarıhı jadymyz ben ulttyq biregeıligimizdi saqtaýdyń mańyzdylyǵyn atap ótti. Biz kelesi urpaǵymyz básekege qabiletti, bilikti, shynaıy patrıot bolý úshin genetıkalyq kodymyzdy óshirmeı. kelesi urpaqqa jalǵastyrýymyz kerek. Naýryz meıramy-bul kóktemniń, eńbek pen qýanyshtyń merekesi ǵana emes, sonymen qatar birlik, tatýlyq merekesi. Naǵyz kúsh-jigerimiz eldiń birliginde jatyr. Ortaq kúsh-jigerimizdiń arqasynda ǵana biz óz elimizdi odan ary jaqsarta alamyz. Bul mereke bizge jańa jetistikterge jetý úshin kúsh pen qýat bergeı. Al árbir shańyraqqa beıbitshilik, tynyshtyq pen amandyq tileımin», - dedi Nurlan Noǵaev.
Aqtaýdaǵy merekelik is-shara aıasynda óńir ónerpazdarymen kontsertimen bastalyp, balýan kúres, ózge de ulttyq oıyndarmen jalǵasatyn bolady.
