Naýryznama: Mańǵystaýda 189 is-shara ótedi
AQTAÝ. KAZINFORM - Mańǵystaýda Naýryz merekesine oraı 189 is-shara uıymdastyrylady.
Óńirde 21-23 naýryz kúnderi aralyǵynda 53 shara uıymdastyrylmaq. Bul týraly óńirdiń mádenıet, arhıvter jáne qujattama basqarmasy basshysynyń orynbasary Gúlzaıda Tóleýǵalıeva málimdedi.
Onyń aıtýynsha, merekege arnalǵan is-sharalardy daıyndaýǵa jáne olardy ótkizýge barlyq memlekettik qurylymdar, kásiporyndar, úkimettik emes uıymdar, etno-mádenı ortalyqtar, qoǵamdyq birlestikter, jastar uıymdary, ǵylymı jáne shyǵarmashylyq ıntellıgentsııa ókilderi jumyldyrylmaq.
"Negizgi merekelik sharalar 22 naýryz kúni ótedi. Kıiz úılerde taqyrypqa saı ulttyq oıyndardan jarystar, qolóner buıymdarynan kórme, sheberlik sabaqtary sekildi is-sharalar ótkiziledi", - dedi Gúlzaıda Tóleýǵalıeva.
Sonymen qatar, Jańaózen qalasynda jáne aýdandarda «Nur sebele, Ulystyń Uly kúni!» atty aýdandyq mádenı-sporttyq is-sharalar ótkiziledi. Bul rette Aqtaý qalasynda da arnaıy is-sharalar júzege asyrylady.
Aqtaý ákiminiń orynbasary Nurtas Salı bıylǵy Naýryz meıramy erekshe toılanatynyn jetkizdi. TÚRKSOI halyqaralyq uıymynyń sheshimine sáıkes Aqtaý qalasy 2025 jyly Túrki áleminiń mádenı astanasy bolyp bekitildi. Sondyqtan kelesi jylǵy úlken sharalardyń daıyndyǵy men bastaýy osy Naýryz merekesinen bastaý alǵaly otyr.
"Qala kósheleri, ǵımarattar Naýryz merekesine saı bezendiriledi. 21 naýryz kúni keshki saǵat 19:00-de Amfıteatr sahnasynda Abaı mádenı-demalys kesheniniń «Altybaqan» baǵdarlamasy uıymdastyrylady. 22 naýryz kúni ádettegideı Aqtaý qalasyndaǵy teńiz jaǵalaýynda kıiz úıler qalashyǵy qurylady. Onymen qosa, kıiz úılerde taqyrypqa saı ulttyq óner, ulttyq oıyndardan jarystar, qolóner buıymdarynan kórme, sheberlik sabaqtary t.b. is-sharalar ótpek. Sondaı-aq, 12.00-de «Bastańǵy - baqyt bastaýy» atty shara bastalyp, 19.00-de qala ónerpazdarynyń merekelik kontserti jáne merekelik sharalar ot shashýmen aıaqtalady", - dedi Nurtas Salı.
Merekege oraı barlyq qala turǵyndary men qonaqtaryn merekelik sharalarǵa belsendi qatysý arqyly saltymyz ben dástúrimizdi nasıhattaýǵa úndeý jasalyp otyr.
Sondaı-aq, Mańǵystaý oblysynda 29 aqpan men 3 naýryz aralyǵynda Alǵys aıtý kúnine oraı 10 myńǵa jýyq is-shara ótken bolatyn. Sondaı-aq, Amal merekesine oraıda Otpan taýda birneshe mádenıe sharalar jalǵasyn tapty.
