Naýryznama aıasynda áskerı qyzmetshiler qaıyrymdylyq aktsııasyn ótkizdi
ASTANA. KAZINFORM – Naýryznama onkúndigi barysynda Qarýly kúshterdiń áskerı qyzmetshileri birqatar qaıyrymdylyq sharalaryna belsendi qatysyp, muqtaj jandarǵa qoldaý kórsetti. Bul týraly Qorǵanys mınıstrliginiń baspasóz qyzmeti habarlady.
Almaty oblysynda Bitimgerlik operatsııalar ortalyǵynyń jeke quramy men tildik daıyndyq kýrstarynyń tyńdaýshylary arnaıy qaıyrymdylyq aktsııasyn uıymdastyrdy.
Aktsııa barysynda bitimgerler Qaraoı, N. Tilendıev jáne Qosózen aýyldaryndaǵy 15 otbasynyń shańyraǵyna baryp, olarǵa azyq-túlik sebetteri men kúndelikti qajetti zattardy tabystady.
Bitimgerlik operatsııalar ortalyǵy bastyǵynyń orynbasary — shtab bastyǵy polkovnık Baqytjan Jetpisovtiń aıtýynsha, halqymyzdyń qaıyrymdylyq, ózara kómek jáne jaqynǵa janashyr bolý dástúrleri ejelden erekshe mańyzǵa ıe. Áskerı qyzmetshiler úshin elge qyzmet etý men qıyn jaǵdaıda qol ushyn sozý — patrıotızm men Otanǵa degen adaldyqtyń aıqyn kórinisi.
Sonymen qatar Shymkent garnızonyndaǵy 35748 áskerı bóliminiń áskerı qyzmetshileri áskerı qyzmetshilerdiń otbasy múshelerimen jumys qyzmetimen birlesip «Jaqsylyq jasap jarysaıyq» atty qaıyrymdylyq aktsııasyn ótkizdi.
Ulttyq kıim kıgen mehanıkalandyrylǵan quramanyń ókilderi Shymkent qalasyndaǵy Sáýle shaǵyn aýdanynda turatyn birneshe otbasynyń úıine baryp, azyq-túlik sebetterin tabystap, qoldaý kórsetti.
Bólim komandıri podpolkovnık Sergeı Bıbolatovtyń aıtýynsha, mundaı ıgi bastamalar áskerı ujym úshin jaqsy dástúrge aınalǵan.
Jalpy, Naýryznama aıasynda uıymdastyrylǵan qaıyrymdylyq sharalary qazaq halqynyń izgilik pen ózara kómekke negizdelgen dástúrlerin dáriptep, qoǵamdaǵy birlik pen janashyrlyqty nyǵaıta tústi. Qarýly kúshterdiń jeke quramy aldaǵy ýaqytta da ómirlik qıyn jaǵdaıǵa tap bolǵan azamattarǵa, erekshe bilim berý qajettilikteri bar balalarǵa, kópbalaly otbasylarǵa jáne qamqorlyqqa alynǵan uıymdarǵa qoldaý kórsetýdi jalǵastyra bermek.
Aıta ketelik Astanada Tartys Fest ulttyq sport festıvali ótedi.