Naýryznama: Astanada kitap kórmesi ashyldy

QR Ulttyq akademııalyq kitaphanasynda Mádenıet jáne ulttyq dástúrler kúnine arnalǵan «Ejelgi merekeniń máńgilik qundylyqtary» atty kitap kórmesi ashyldy. Bul týraly Astana qalasy ákimdiginiń baspasóz qyzmeti habarlady.

Kórmede Shyǵys elderindegi Naýryz merekesi, tarıh jáne mádenı dástúrler týraly jarııalanymdar usynyldy.

«Bıyl Naýryz meıramy elimizde jańa baǵytta atap ótilip jatyr. Merekelik is-sharalar Kórisý kúnimen bastaldy, oǵan bizdiń kitaphana qyzmetkerleri belsendi qatysty.15 naýryzda kórme ashyldy. Naýryznamanyń onkúndiginde kitaphanada taqyryptyq is-sharalar ótkiziledi», – dedi Ulttyq akademııalyq kitaphananyń aqparattyq mádenı baǵdarlamalar qyzmetiniń jetekshisi Kúlásh Orazova.

Uıymdastyrýshylardyń aıtýynsha, kórme kelýshiler úshin kún saıyn saǵat 09:00-den 18:00-ge deıin ashyq jáne naýryz aıynyń sońyna deıin jalǵasady.