Naýryzdaǵy UBT nátıjesi jarııalandy: 70% shekti baldan ótti
ASTANA. KAZINFORM – 2026 jylǵy naýryz UBT-synan 179 myńǵa jýyq adam ótti. Talapkerlerdiń 75%-y testileýdi qazaq tilinde, 25%-y orys tilinde jáne 157 adam aǵylshyn tilinde tapsyrdy. Bul týraly Ǵylym jáne joǵary bilim mınıstrligi málim etti.
Talapkerlerdiń 70%-y shekti ball jınady. Bes pán boıynsha ortasha ball 66 baldy qurady. Eń joǵary nátıje — 140 ball.
Atyraý oblysynyń túlegi Kenesova Jazıra tórt pán boıynsha 90 ball jınady. Sonymen qatar Jazıra QAZTEST sertıfıkatyn paıdalanyp, «Qazaq tili» páni boıynsha baldaryn konvertatsııalady. Osylaısha, Kenesova Jazıranyń jalpy nátıjesi 140 baldy quraıdy.
— Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Bul joly 31 myńnan astam ótinish qabyldanyp, olardyń ishinde 17 biregeı test tapsyrmasyna qatysty ótinishter qanaǵattandyryldy. Respýblıkalyq komıssııa jumysyn aıaqtady, talapkerlerdiń sertıfıkattary jeke kabınette qoljetimdi, — delingen habarlamada.
Testke qatysýshylardyń basym bóligi «Matematıka-Fızıka» kombınatsııalaryn tańdaǵan, atap aıtqanda, 18,7%-y tapsyrdy. «Bıologııa-Hımııa» pánderin 16,5% tańdaǵan. Sondaı-aq, top-3 qataryna talapkerlerdiń 10,3% tańdaǵan «Shyǵarmashylyq emtıhan» kombınatsııasy kirdi.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa 408 talapker qatysqanyn aıta ketken jón.
UBT-ny ótkizý barysynda 264 ereje buzýshylyq anyqtaldy. 130 talapker smartfondardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 134 adam testileý kezinde erejelerdi buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq.
2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Eske sala keteıik, mamyrdan keıin UBT-da beıindik pánderdi ózgertýge bolmaıdy.
