Naýryzda 700 adam onlaın qyzmetterdi qoldanýdy úırendi

ASTANA. KAZINFORM — Qazaqstanda elektrondyq servısterge degen qyzyǵýshylyq artyp keledi, bul oqýdan ótken azamattar sanynyń ósýimen rastalady. Tek naýryz aıynyń ózinde shamamen 700 adam HQKO-larda tsıfrlyq saýattylyq pen kıbergıgıena boıynsha oqýdan ótip, onlaın-servısterdi óz betinshe paıdalanýdy bastady. Bul týraly «Azamattarǵa arnalǵan úkimet» MK málim etti.

— Oqý formaty barynsha praktıkalyq baǵytta uıymdastyrylǵan, kúrdeli teorııasyz, naqty ómirlik jaǵdaılarǵa basymdyq beriledi — anyqtamalar alýdan bastap, bólimshege barmaı-aq qyzmetterdi rásimdeýge deıin. Bul adamdarǵa ýaqyt únemdeýge jáne tsıfrlyq ortada ózin senimdi sezinýge múmkindik beredi, — delingen habarlamada.

Oqytý elimizdiń barlyq óńirlerinde tegin jáne aldyn ala jazylýsyz ótkiziledi. Astanada sabaqtar turaqty túrde sársenbi jáne juma kúnderi ótedi, al basqa qalalarda keste HQKO júktemesine qaraı qalyptastyrylady.

Atalǵan bastama Tsıfrlandyrý jáne jasandy ıntellekt jyly aıasynda júzege asyrylyp, memlekettik qyzmetterdiń árbir azamat úshin qoljetimdiligin arttyrýǵa baǵyttalǵan.

1 sáýirden bastap birqatar óńirde kezekshi HQKO-lardyń mekenjaıy ózgergenin eske salamyz.