Naýryzda 67 myń talapker UBT tapsyrdy

ASTANA. KAZINFORM — 2026 jylǵy 2 naýryzda bastalǵan UBT-nyń alǵashqy eki aptasynda 67 myńnan astam talapker testileýden ótti. 

Talapkerlerdiń 66,99%-y testileýdi qazaq tilinde, 32,88%-y orys tilinde jáne 85 adam aǵylshyn tilinde tapsyrdy.

Eki aptalyq testileý qorytyndysy boıynsha talapkerlerdiń 61%-y shekti ball jınady. Bes pán boıynsha ortasha ball 59 baldy qurady. Eń joǵary nátıje –136 ball.

Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa 192 talapker qatysqanyn aıta ketken jón.

Talapkerlerdiń test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıatsııaǵa berý quqyǵy bar. Tehnıkalyq sebepter boıynsha apellıatsııa tikeleı testileý kezinde qabyldanady. Nátıjeleri bar sertıfıkattar apellıatsııa qarastyrylǵannan keıin jeke kabınetterde qoljetimdi bolady.

UBT-ny ótkizýdiń eki aptasy boıynsha 117 ereje buzý anyqtaldy. 69 talapker smartfondardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetildi. Taǵy 48 adam testileý kezinde ereje buzǵany úshin aýdıtorııadan shyǵaryldy, olardyń nátıjeleri joıyldy. Ózge adamdardyń ornyna kirý faktileri anyqtalǵan joq.

2026 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.

Esterińizge sala ketsek, testileýge qatysýǵa 184 myńǵa jýyq ótinish kelip tústi. 

Aıta ketelik UBT-dan 139 ball alǵan qostanaılyq túlek muǵalim mamandyǵyn tańdaǵany týraly jazǵan edik.