Jańǵyrtý jobasy: Almatydaǵy Naýryzbaı aýdany elektr jelileriniń tozýy 30% tómendetilmek
ALMATY. KAZINFORM – Almaty ákimi Erbolat Dosaev Naýryzbaı aýdanynyń turǵyndarymen kezdesýde elektr jelileri men transformatorlyq qosalqy stantsııalardy jańǵyrtý aýdandaǵy ınjenerlik ınfraqurylymdy damytýdyń mańyzdy mindeti ekenin aıtty.
Shahar basshysynyń sózinshe, aýdannyń elektr jelileriniń 85%-y tolyǵymen tozǵan, sondyqtan jaryq jıi óship qalady. Aýdandy turaqty elektrmen qamtamasyz etý úshin 2021 jyldyń qyrkúıeginde merdiger uıym Aqjar, Qaraǵaıly, Quramys, Rahat, Taýsamaly jáne Shuǵyla shaǵyn aýdandarynda elektr jelilerin jańartý jumystaryn bastaǵan bolatyn. Alaıda sol jyldyń qarasha aıynda jobanyń qymbattaýyna baılanysty jumys toqtatyldy. 2023 jyldyń maýsymynda túzetýlerden keıin jumys qaıta jandandy.
Joba aıasynda josparlanǵan 1231 tirektiń 854-i ornatylyp, 11,2 km elektr jelileri jańǵyrtyldy. Qosymsha 26 transformatorlyq qosalqy stantsııa ornatylady. Jumysty bıyl qyrkúıek aıynyń sońyna deıin aıaqtaý josparlanǵan. Sonyń nátıjesinde jelilerdiń tozýy 30 paıyzǵa tómendeıdi.
«Alataý Jaryq kompanııasy» AQ jelisi boıynsha 17 transformatorlyq qosalqy stantsııa men 98 km elektr jelisine kúrdeli jáne aǵymdaǵy jóndeý júrgizildi. Jyl sońyna deıin taǵy 54 transformatorlyq qosalqy stantsııa men 150 km elektr jelileri jóndeledi.
«Jyl basynan beri sapaly syrtqy jaryqtandyrýmen qamtamasyz etý úshin 20 shaqyrymnan astam áýe jáne kabel jelisi men 2530 sham aýystyryldy. Jyl sońyna deıin taǵy 3 shaqyrym kabel jelisin jańǵyrtý, sondaı-aq 3 myń sham men 50 jaryqtandyrý tiregin aýystyrý kózdelgen. Sonymen qatar, jyl sońyna deıin «Halyq qatysatyn bıýdjet» baǵdarlamasy aıasynda aýdandaǵy jaryq ornatylmaǵan qalǵan 35 kóshe men tuıyq kóshelerge syrtqy jaryqtandyrý jelilerin júrgizý josparǵa endi», – Almaty ákimi Erbolat Dosaev.
