«Naýryz jumysker»: baspana alǵandar arasynda qaı sala mamandary basym

ASTANA. KAZINFORM - «Naýryz jumysker» baǵdarlamasy boıynsha berilgen qoljetimdi nesıelerdiń 60%-yn ónerkásip jáne qurylys salasynyń qyzmetkerleri aldy, dep habarlaıdy «Otbasy bank» turǵyn úı qurylys jınaq banki» AQ baspasóz qyzmeti.

Baspasóz qyzmetiniń habarlaýynsha, «Naýryz jumysker» baǵdarlamasy boıynsha búginge deıin 1 990 qazaqstandyq baspanaly boldy. Olardyń barlyǵy – jumysshy mamandyq ıeleri. Mamandar úı salýmen, elektr energııasyn berý men taratý boıynsha kásiporyndarda, avtomobıl óndirisinde, ken, munaı jáne gazdy óndirý jáne qaıta óńdeý salalarynda jumys isteıdi.

Jumysshy mamandarynyń eńbegi orasan zor. Qıyn jumystary úshin qoldaý jáne turǵyn úı máselesin sheshýge kómektesý úshin bıyl Otbasy bank («Báıterek» holdınginiń enshiles uıymy) alǵash ret olarǵa arnalǵan jeke baǵyt – «Naýryz jumysker» baǵdarlamasyn iske qosty. Ótinimderdi qabyldaý 2025 jyldyń 17 naýryzynda bastaldy. Baǵdarlamanyń jumys isteý kezeńinde eń kóp nesıe kólemi ónerkásip pen qurylys salasynyń qyzmetkerlerine berildi. Osy salalarda eńbek etip júrgen 1176 mamany baspanaly boldy.

Nesıe sany boıynsha ekinshi orynda – kólik salasynyń mamandary. Osy saladaǵy mamandardyń 396 ókili turǵyn úıge ıe boldy. Úshtikti energetıka salasy qorytyndylady – osy sektordyń 269 mamany qoljetimdi nesıe rásimdeı aldy.

Sonymen qatar, «Naýryz jumysker» baǵdarlamasynyń qoldaýymen óz baspanasyn aýyl sharýashylyǵy, sý resýrstary jáne sýarmaly jerler salasynyń qyzmetkerleri de aldy. Baǵdarlama 1143 kásiporyn men 8 230 jumysshy mamandyqty qamtıdy.

Baǵdarlama qatysýshysy bolý úshin arnaıy konkýrsqa qatysý mindetti emes. Jumys berýshiden qyzmetkerdiń laýazymy, mamandyǵy jáne kásip túrin kórsetetin anyqtama alyp, ony kez kelgen Otbasy bank bólimshesine ótinishpen tapsyrý jetkilikti. Jumysshy mamandyqtarynyń ataýlarynyń tizimi, kásipkerlik qyzmet túrleri jáne jumys berýshiden alynatyn anyqtama formasymen Banktiń resmı saıtyndatanysýǵa bolady.

«Naýryz jumysker» baǵdarlamasyna qatysýshylarynyń ortasha jasy – 31. Jumysshy mamandyq ıeleri arasynda áıelder de az emes. Óıtkeni alynǵan nesıelerdiń shamamen 20%-y názik jandarǵa tıesili. Solardyń biri – Aqkúmis Qudaıbergen. Ol temirjol salasynda ınjener-tehnolog bolyp qyzmet atqarady. Jas maman Kókshetaýda ata-anasymen birge turypty. «Naýryz jumysker» baǵdarlamasynyń kómegimen Aqkúmis Astanadan óz páterin satyp aldy.

«Stýdent kezimde men Otbasy bankinde depozıt ashtym. Jumysqa kiriskennen keıin ony múmkindiginshe tolyqtyra berdim. Osy áreketim nesıe alýda maǵan kóp kómektesti. Óz baspanamnyń bolýy týraly kópten beri armandaıtynmyn. Aldymen «Naýryz» baǵdarlamasyna qatysýdy oıladym, biraq onda konkýrs bar eken jáne ótpeı qalý qaýpi boldy. Bankte maǵan «Naýryz jumysker» baǵytynda nesıe alýǵa keńes berdi. Baǵdarlama sharty da sáıkes kelip turdy. Nesıege bergen ótinishim maquldanǵanyna qýanyshtymyn. Mine Astanadan óz páterimdi satyp aldym», – deıdi Aqkúmis Qudaıbergen.

«Naýryz jumysker» baǵyty men «Naýryz» baǵdarlamasynyń sharttary bir. Aımaqtar úshin nesıeniń maksımaldy somasy – 30 mln teńge, al Astana men Almaty úshin – 36 mln teńge. Úlken qalalar men oblys ortalyqtarynda tek jańa baspanany satyp alýǵa bolady. Baǵdarlama qatysýshylary ózderine qolaıly turǵyn úı keshenin jáne páterdi «Baspana market» portaly (otbasybank.kz) arqyly tańdaı alady. Qazir onda 10 262 páter bar 593 nysan usynylǵan.

Ekinshi naryqtaǵy turǵyn úıdi tek monoqalalarda jáne aýyldyq eldi mekenderde satyp alýǵa bolady. Osy ýaqytqa deıin 338 qatysýshy ekinshi naryqtan óz baspanasyn satyp aldy.

«Naýryz jumysker» baǵdarlamasynyń sharttary qandaı

Nesıe mólsherlemesi: Áleýmettik osal toptaǵy azamattar úshin (turǵyn úı kezeginde turǵandar) – jyldyq 7% (JTSM 7,1%-dan 9,6%-ǵa deıin); Barlyq basqa kategorııalar úshin – jyldyq 9% (JTSM 9,4%-dan 13%-ǵa deıin).

Alǵashqy jarna - jańa, taza árleýdegi páterdi daıyn satyp alǵanda – keminde 10%; Jańa páterdi árleýsiz kúıinde nemese ekinshi naryqtaǵy turǵyn úıdi (monoqalalar men aýyldyq eldi mekenderde) satyp alǵanda – keminde 20%.

Baǵdarlamaǵa qatysý úshin talaptar:

Otbasy bankinde depozıti bolýy kerek. Depozıttiń merzimi mańyzdy emes, ony ótinish berer aldynda ashýǵa bolady.

Otbasy bankindegi jınaq shotynda keminde 2 mln teńge bolýy kerek. Bul somany baǵdarlamaǵa ótinish bergenge deıin birjolata salýǵa bolady.

Ótinish berýshi men onyń otbasy músheleri sońǵy 5 jyl ishinde turǵyn úıge ıe bolmaýy tıis. Otbasy músheleri – jubaılar jáne olardyń kámeletke tolmaǵan balalary. Eger adam nekede bolmasa, turǵyn úıdiń joqtyǵy tek ózinde tekseriledi.

Sońǵy 6 aıda resmı tabysy bolýy qajet. Sonymen birge jumys berýshi bergen anyqtamada keminde sońǵy 3 aıdyń mindetti zeınetaqy jarnalary kórsetilýi kerek.

«Naýryz» turǵyn úı baǵdarlamasy boıynsha ótinim qabyldaý 3 qarashada bastalady.