«Naýryz» turǵyn úı baǵdarlamasy boıynsha ótinim qabyldaý 3 qarashada bastalady

ASTANA. KAZINFORM - Qazaqstandyqtar úshin baspana alýdyń tıimdi múmkindigin usynatyn «Naýryz» turǵyn úı baǵdarlamasy boıynsha ótinim qabyldaý 2025 jylǵy 3 qarashadan bastap 1 jeltoqsanǵa deıin júrgiziledi.

QR Ónerkásip jáne qurylys mınıstrligi baspasóz qyzmetiniń habarlaýynsha, baǵdarlamaǵa Otbasy bankiniń barlyq salymshylary, sondaı-aq depozıtinde keminde 2 mıllıon teńge jınaǵy bar jáne sońǵy bes jyl ishinde ózinde de, otbasy múshelerinde de turǵyn úıi bolmaǵan azamattar qatysa alady.

Ótinim berý protsesi tolyǵymen onlaın formatta júzege asyrylady. Qatysýshylar Baspana Market platformasyndaǵy jeke kabınetteri arqyly ótinim berip, nátıjesin sol jerde baqylaı alady. Ótinim berý tártibi men kezeńderi týraly bank paraqshasyndaǵy «Naýryz» bóliminde jarııalanǵan.

Baǵdarlama sharttaryna sáıkes, taza árlengen jańa turǵyn úıdi satyp alý úshin bastapqy jarna 10%-dan, al árlenbegen nemese qaıtalama turǵyn úı úshin bastapqy jarna 20%-dan bastalady. Syıaqy mólsherlemesi áleýmettik osal toptar úshin 7%-dan (JTSM 7,1%-dan), basqa qatysýshylar úshin 9%-dan (JTSM 9,4%-dan) esepteledi.

Nesıe somasynyń eń joǵary mólsheri óńirler úshin — 30 mıllıon teńge, al Astana men Almaty qalalary úshin — 36 mıllıon teńge kóleminde belgilengen. Nesıe merzimi 19 jylǵa deıin sozylady.

Baǵdarlama aıasynda Astana, Almaty jáne oblys ortalyqtarynda tek birinshi naryqtaǵy (jańa) turǵyn úılerdi satyp alýǵa bolady. Al monoqalalar men aýyldyq eldi mekenderdiń turǵyndary úshin birinshi jáne ekinshi naryqtaǵy úıler usynylady. Barlyq turǵyn úı nysandary Baspana Market portaly arqyly tańdalady.

Osyǵan deıin ıpotekalyq mólsherlemelerdi tómendetý 2026 jylǵy 1 shildege deıin toqtatylatyny týraly jazdyq.