Naýryz onkúndiginde aqtóbelik jyrshylar táýlik boıy jyrlaıdy
AQTÓBE. KAZINFORM – Gınness rekordyna ený úshin «Qyrymnyń qyryq batyry», «Paıǵambarlar qıssasy» dastanyn jyrlaıdy. Sonymen birge oblys ortalyǵyndaǵy 26 alańda 52 kıiz úı tigiledi. Shahardaǵy alańdarda 1,5 tonna kóje, 1 tonna baýyrsaq jáne 2,5 tonna palaý satylymǵa shyǵarylady.
Aqtóbe oblysynda 14-23 naýryz kúnderi aralyǵynda 700 myń kórermendi qamtıtyn 1 600 shara uıymdastyrylady. Eń aýqymdysy 16-naýryzda bastalyp, 17-naýryzǵa deıin jalǵasady. Bul kúni «Er Edige» jyr mektebiniń tárbıelenýshileri Aqtóbe oblystyq halyq shyǵarmashylyǵy ortalyǵynda «Qyrymnyń qyryq batyry» atty jyraýlar saǵatyn ótkizedi.
– Jyrshy-jyraýlar 24 saǵat boıy úzdiksiz jyrlaıdy. Sóıtip kóne salt-dástúrimizdi jańǵyrtpaq. Jyrshylar 16-naýryz saǵat 11:00-den bastap, 17 naýryz saǵat 11:00-ge deıin táýlik boıy jyrlaıdy. Resmı túrde Dúnıejúzilik rekordtar kitabyna tirkeý josparlanyp otyr, - dedi Aqtóbe oblystyq mádenıet, arhıvter jáne qujattama basqarmasynyń basshysy Altynaı ıÝnısova.
«Er Edige» jyr mektebiniń jetekshisi Ádilbek Sarınniń aıtýynsha, bul kúni 33 oqýshy men 2 muǵalim jyr aıtady. Olardyń biri 4-5 saǵat, taǵy biri 15-20 mınýt jyrlaıdy.
– Júz jyldyqta bir táýlik jyrlap, taspaǵan túsirgen degendi estimedim. Biz dál osyny qolǵa aldyq. Gınness rekordtar kitabynyń ókili keledi. Eki jyldan soń 48, úsh jyldan soń 72 saǵatqa jańartqymyz keledi. Bul joly balalar úshin tamaqtaný, jatyn oryn qarastyrylǵan, - dedi Ádilbek Sarın.
Sonymen birge Ǵ.Jubanova atyndaǵy fılarmonııanyń shyǵarmashylyq ujymdary arasynda «SAUKELE - 2026» baıqaýy, ortalyq alań sahnasynda «Dastur-fest» festıvali ótedi. Ulttyq kıim kúni aıasynda «Ulttyq kıim - ult aınasy» baıqaýy, ulttyq kıim sherýi uıymdastyrylady. 22-naýryzda «Naýryz – jarqyn jyl basy» mádenı-kópshilik sharasy ótedi.
– Naýryzda qaladaǵy 26 alańda 52 kıiz úı tigilip, ulttyq naqyshta bezendiriledi. Shahardaǵy alańdarda 1,5 tonna kóje, 1 tonna baýyrsaq jáne 2,5 tonna palaý satylymǵa shyǵarylady, - dedi Aqtóbe oblystyq mádenıet, arhıvter jáne qujattama basqarmasynyń basshysy Altynaı ıÝnısova.
Aıta keteıik, búgin – Amal merekesi. Amal merekesi respýblıkalyq dárejede qaıta jandandy, ulttyq merekege aınaldy. Kórisý salty, qara shańyraq uǵymy, qara qazannan dám tatý dástúri jańǵyryp, qalyptasty.
