Naýryz meıramynda mektepterde dastarhan jaıýǵa bola ma

AQTÓBE. KAZINFORM — Oqýshylar astan ýlanyp qamaýy úshin dastarhan jaıýǵa tyıym salynǵan. Tek mádenı-tanymdyq sharalar ótedi. 

Elimizde Naýryz meıramy aıasynda onkúndik ótip jatyr. Tek qoǵamdyq oryndarda emes, mektep, balabaqshada túrli shara uıymdastyrylady. Tek birqatar shekteý qoıylǵan.

— Mektepterde Naýryz meıramynda dastarhan jaıýǵa qatysty shekteý bar ekeni ras. Bul eń aldymen balalardyń qaýipsizdigi men densaýlyǵyn qamtamasyz etýge baǵyttalǵan talaptarmen baılanysty. Bilim berý uıymdarynda sanıtarlyq-epıdemıologııalyq normalarǵa sáıkes, syrttan ákelingen taǵamdardy jappaı tutynýǵa ruqsat etilmeıdi. Sebebi olardyń saqtalý jaǵdaıy, daıyndalý talaptary men sapasyna mektep ákimshiligi tolyq jaýap bere almaıdy. Mundaı talaptar balalardyń densaýlyǵyna qaýip tóndirmeý maqsatynda engizilgen. Mektepterde merekelik is-sharalardy ótkizýge shekteý joq. Bilim berý uıymdarynda Naýryz meıramyna arnalǵan tárbıelik saǵattar, ulttyq dástúrlerdi tanystyrý, kontserttik baǵdarlamalar, ulttyq oıyndar men kórmeler uıymdastyrylady. Meıramnyń mazmuny men rýhyn balalarǵa tanystyrý jumystary jalǵasyp keledi. Basty maqsat — balalardyń qaýipsizdigin saqtaı otyryp, ulttyq qundylyqtardy dáripteý, — dep habarlady Aqtóbe oblysy ákiminiń baspasóz qyzmeti.

Aıta keteıik, 14-23 naýryz kúnderi Naýryznama onkúndigi aıasynda respýblıka boıynsha 747 sporttyq-buqaralyq is-shara ótkizý josparlanǵan. Bul týraly Týrızm jáne sport mınıstrligi habarlady.