Naýryz meıramynda batysqazaqstandyq 80 otbasy baspanaly boldy
ORAL. KAZINFORM — Naýryz meıramynda Oral qalasynyń Zashaǵan kentinde 9 qabatty jańa turǵyn úı qoldanysqa berildi. Aıtýly shara Naýryznamanyń Yntymaq kúnimen qatar keldi.
Páter kiltterin tapsyrý rásimine Batys Qazaqstan oblysynyń ákimi Narıman Tóreǵalıev qatysty.
Óńir basshysy jınalǵandardyń bárin Naýryz meıramymen quttyqtap, jańa qonys ıelerine baqyt tiledi.
«Memleket basshysy Qasym-Jomart Toqaev óz joldaýlarynda halyqtyń ál-aýqaty men ómir súrý sapasyn arttyrý — memlekettiń basty mindeti ekenin atap ótti. Osy oraıda, ár otbasyn turǵyn úımen qamtamasyz etýge baǵyttalǵan bastamalar mańyzǵa ıe. Búginde Oral qalasynda memlekettik baǵdarlamalar arqyly 14 kóppáterli úıdiń qurylysy júrgizilýde. Al memlekettik baǵdarlama aıasynda salynǵan kópqabatty turǵyn úıler „Otbasy bank“ AQ arqyly kezekte turǵandarǵa jeńildetilgen paıyzdyq nesıemen beriledi. Búgin, mine osy baǵdarlama arqyly kezekte turǵan 80 otbasy baspanaly boldy. Búgingi jańa páter ıelerin quttyqtaımyn. Sondaı-aq, Naýryz meıramy barshańyzǵa qut-bereke ákelsin!» – dedi aımaq basshysy.
Prezıdentiniń tapsyrmasy boıynsha elimizde «Qýatty óńirler — el damýynyń draıveri» jobasy júzege asyp jatyr. Jańa turǵyn úı qurylysy atalmysh joba aıasynda múmkin boldy.
Baspanaly bolǵandardyń kópshiligi múmkindigi shekteýli, sondaı-aq páter kezeginde turǵan jandar.
«Kóp jyl kezekte turdyq. Endi mine armanymyz oryndaldy. Memleketke rızamyz. Endi mine, Naýryz meıramyn jańa páterde qarsy alamyz, qýanyshymyzda shek joq» — dedi jańa páter ıesi Nurgúl Esenalıeva.
Aıta ketý kerek, Oral qalasynda 2024 jyly 1400-den astam páterdi qoldanysqa berý josparlanyp otyr.
