Naýryz meıramynda 11 myń dombyrashy Qazaqstan rekordtar kitabyna jańa jetistik engizbek
ASTANA. KAZINFORM — Naýryz merekesin atap ótý aıasynda Bilim basqarmasy «Dombyra úni» atty aýqymdy aktsııa uıymdastyrady, dep habarlaıdy Almaty oblysynyń ákimdigi.
Qalanyń 6-10 synyp oqýshylarynan quralǵan 11 000 jas dombyrashy bir mezette kúı oryndap, ulttyq ónerdiń qudiretin pash etedi.
— Іs-sharanyń basty maqsaty – qazaqtyń dástúrli mýzykasyn dáripteý, jas urpaqtyń ulttyq ónerge degen qyzyǵýshylyǵyn arttyrý jáne mádenı murany keńinen nasıhattaý. Bul bastama Qazaqstanda ulttyq aspapta bir mezette kúı oryndaǵan eń iri mýzykalyq sharalardyń biri bolmaq. Qalanyń barlyq aýdanynan jınalǵan oqýshylar bir sahnada óner kórsetip, qazaq halqynyń baı rýhanı murasyna degen qurmettiń aıqyn belgisin tanytady, — delingen habarlamada.
Іs-sharanyń qurmetti qonaqtary retinde tanymal qazaqstandyq ónerpazdar — Asylbek Eńsepov, Rınat Gaısın, Nurlan Alban jáne Álı Oqapov qatysady. Belgili mýzykanttar fleshmob qatysýshylaryna qoldaý bildirip, qala turǵyndaryn Naýryz merekesimen quttyqtaıdy.
Aktsııa qorytyndysy boıynsha bul is-sharany Qazaqstan rekordtar kitabyna ulttyq aspapta kúıdi bir ýaqytta eń kóp adam oryndaǵan mádenı oqıǵa retinde engizý josparlanyp otyr.
Aýqymdy mýzykalyq fleshmob Naýryz merekesine arnalǵan is-sharalardyń jarqyn kórinisine aınalyp, ulttyq mádenıetti jastar arasynda keńinen nasıhattaýǵa úles qosady. Bul jaı ǵana kontsert emes, myńdaǵan jas júrektiń bir yrǵaqta soǵýy men ata-baba murasyna degen qurmettiń kórinisi.
Іs-shara 2026 jylǵy 17 naýryz kúni saǵat 13:00-de Almaty Arena kesheninde ótedi.
Budan buryn Dımash Qudaıbergen Almatydaǵy mýzeıge atasynyń dombyrasyn syıǵa tartqanyn jazdyq.