Naýryz meıramyn keńinen dáripteýimiz kerek — Memleket basshysy
ASTANA. KAZINFORM — Naýryz meıramyn keńinen dáripteýimiz kerek. Bul týraly Qazaqstan halqy Assambleıasynyń HHHІV sessııasynda Memleket basshysy Qasym-Jomart Toqaev aıtty.
— Qazaqstan — taǵdyrdyń jazýymen shette týyp, shette ósken barsha qazaqtyń tarıhı Otany. Sheteldegi qazaqtardyń basym kópshiligi ana tili men ata dástúrin berik ustanyp keledi. El birligi — eń aldymen, kúlli qazaqtyń birligi. Ekinshiden, el birligi — qasıetti qazaq jerin meken etken barsha etnostyń birligi. Biz bul týraly únemi aıtamyz. Kezinde Qazaqstanǵa mıllıondaǵan adam jer aýdaryldy. Halqymyz olardyń eshqaısysyn jat kórmeı, baýyryna basty. Sol býynnan taraǵan mıllıondaǵan adam — qazir Qazaqstannyń tolyqqandy adal azamattary. Olar memleketimizdi damytýǵa zor úles qosyp, el ıgiligine qyzmet etip júr. Qazaq jurty egemendigin alǵan soń qandastarymyzdyń elge qaıtýyna jol ashyldy. Qazaqstannan da kóptegen adam óziniń tarıhı atamekenine oraldy, — dedi Qasym-Jomart Toqaev.
Memleket basshysy 4 mıllıonǵa jýyq otandasymyz Germanııaǵa, Polshaǵa, Izraılge jáne basqa elderge kóship ketkenin eske saldy.
— Biraq olardyń kóbi qazaq jurtynyń jaqsylyǵy men qamqorlyǵyn umytpaıdy. Qazaqstannyń týyn tórine ilip, elge degen saǵynyshyn kórsetip otyrady. Qazaqsha sóılep, qazaqsha án aıtyp, qazaqtyń salt-dástúrin ustanady. Jyl saıyn Naýryz meıramyn atap ótedi. Barsha Qazaqstan azamattary, shetelde turyp jatqan barlyq otandasymyz — bári de bir úlken otbasy deýge bolady. Otbasy qundylyqtaryn nyǵaıtý — turaqty jáne úılesimdi qoǵamnyń negizi, elimizdiń jarqyn bolashaǵynyń kepili. Jan-jaqty damyǵan tulǵa da, jaýapkershiligi zor azamat ta, Otanǵa degen súıispenshilik te otbasynda qalyptasady. Biz elimizdiń ár shańyraǵy, ár azamaty toılaıtyn merekege qurmetpen qarap, keńinen dáripteýimiz kerek. Mine, sondaı naǵyz halyqtyq merekelerdiń biri, bul — Naýryz meıramy. Bıyl jańa tujyrymdamaǵa saı biz Ulystyń uly kúnin erekshe atap óttik. Kóktemgi kóńil-kúı men myzǵymas birlik merekesi elimizdiń ár aımaǵynda toılandy. Osylaısha, bizdiń qoǵamda jasampaz jańa dástúrler qalyptasyp, ornyǵýda, — dedi Prezıdent.
Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.
Osyǵan deıin Toqaev barlyq etnomádenı birlestikti «Taza Qazaqstan» aktsııasyna belsene qatysýǵa shaqyrdy.
Sondaı-aq Prezıdent el ishine iritki salǵysy keletinder zańǵa sáıkes qatań túrde jaýapqa tartylatynyn atap ótti.