Naýryz merekesi Belgııanyń Brıýgge qalasynda toılandy
ASTANA. KAZINFORM – Belgııada turatyn qazaqtar Naýryz meıramyn týrıstik tanymal Brıýgge qalasynda toılady, dep habarlaıdy Kazinform agenttiginiń EO-daǵy tilshisi.
Belgııanyń Flandrııasynyń qaq ortasynda Qazaq mádenı ortalyǵynyń belsendileri jerlesteri men jergilikti turǵyndar úshin Naýryz merekesin uıymdastyrdy. Іs-shara qonaqtaryna Belgııadaǵy ulttyq dıasporalarǵa mádenı jáne áleýmettik qoldaý kórsetýge baǵyttalǵan «Avansa» úkimettik emes uıymy esigin aıqara ashty.
Bes-alty bólmeden turatyn keńistikte ulttyq kıimder kórmesi, kıiz úı áshekeıleri, qazaq taǵamdarynan dám tatý boldy. Sondaı-aq Belgııadaǵy Qazaq mádenı ortalyǵynyń ókilderi qazaqtyń mýzykalyq aspaptary boıynsha sheberlik sabaqtaryn, balalarǵa sýret salý sabaqtaryn jáne basqa da sharalardy ótkizdi.
Merekeni toılaýǵa jınalǵandar Naýryz kóje iship, jańa pisken baýyrsaqtan dám tatty. Qatysýshylardyń barlyǵy Naýryz meıramy – shekarasyz, týǵan dalasynan myńdaǵan shaqyrym jerdegi júrekterdi biriktiretin jańarý merekesi ekenin atap ótti.
Qazaq mádenı ortalyǵynyń dırektory Ardaq Moldanıazova olardyń bastamasy Belgııada resmı tirkelgenin, endi qandastarymyz demalys kúnderi Brıýsselde turaqty túrde bas qosyp, qazaq tilin, salt-dástúrin, ádet-ǵurpyn úırenetinin túsindirdi. Qazaq tili men dombyra sabaǵy Brıýsseldegi qazaq halqynyń baı mádenıeti men tilin bilýge yntaly keıbir belgııalyqtardy da qyzyqtyryp otyr.
Belgııalyq stýdent Lýkas Mommer Belgııada dombyra shertýdi úırenip júrgenin aıtty. Ol qazaqtyń ulttyq aspabynyń únin estigende birden úırengisi kelgenin jasyrmady.
– Meniń atym – Lýkas. Men Belgııadanmyn. Dombyrany úırenip jatqanyma úsh aı boldy. Ustazym – Qaırat. Dombyrany qatty jaqsy kóremin, óıtkeni ol óte ádemi aspap, onyń úni erekshe. Basqa elderdiń mádenıetin úırený men úshin qyzyq boldy. Maǵan osyndaı múmkindik berilgenine óte qýanyshtymyn, - dedi belgııalyq stýdent.
Eske sala keteıik, buǵan deıin Londonda Naýryz meıramy toılanyp jatqanyn jazǵan edik.
