Naýryz kójege arnalǵan ıngredıentter qansha turady

ASTANA. KAZINFORM — Naýryz kóje — jańarý men kóktemniń oıanýyn beıneleıtin dástúrli merekelik taǵam. Ony daıyndaý tásilderi ártúrli. Ulttyq statıstıka bıýrosy Naýryz kójege qosylatyn negizgi ónimderdiń baǵasyn usynǵan eken.

— 1 lıtr aırannyń ortasha baǵasy (2,5%) 446 teńge. Bul taǵamda qoldanylatyn taǵy bir mańyzdy ónim — sút (2,5%), onyń baǵasy lıtrine ortasha eseppen 413 teńge. Arpa jarmasynyń bir kelisi ortasha eseppen 399 teńge turady, elimiz boıynsha onyń eń tómengi baǵasy Kókshetaý (283 teńge) qalasynda tirkelgen. Kúrishke keletin bolsaq, onyń ortasha baǵasy kelisine 639 teńge, kúrishtiń arzany Shymkentte eken baǵasy — 535 teńge. Taǵy bir mańyzdy ıngredıenttiń biri — jylqy eti, onyń bir kelisi shamamen 3098 teńge. Qazaqstan boıynsha tuzdyń ortasha baǵasy 76 teńge/kg, — delingen Ulttyq statıstıka bıýrosy taratqan habarlamada.

Sondaı-aq taǵamǵa qurt qosylady, al aımaqqa qaraı taǵy mash, órik nemese kespe qosylýy múmkin.

Aıta ketelik bıyl elimizdiń túkpir-túkpirinde Naýryz meıramy keń kólemde toılanyp, júzdegen mádenı is-shara ótetini týraly jazǵan edik.