Naýryz qarsańynda astanalyq qutqarýshylar baspanaly boldy
ASTANA. KAZINFORM - Elorda ákimdiginde Tótenshe jaǵdaılar mınıstri Shyńǵys Árinov, Astana qalasynyń ákimi Jeńis Qasymbek elordalyq qutqarýshylarǵa on bes qyzmettik páterdiń kiltin tabys etti.
Memleket basshysynyń tapsyrmasy boıynsha jergilikti atqarýshy organdardyń qoldaýymen azamattyq qorǵaý júıesiniń áskerı qyzmetshilerin, órt sóndirýshileri men qutqarýshylaryn áleýmettik qorǵaýdy jaqsartý baǵdarlamasy iske asyp jatyr.
Páter ıeleri qatarynda elordalyq órt sóndirý jáne avarııalyq-qutqarý jumystary qyzmetiniń órt sóndirýshileri, qutqarýshylary men bólimshe komandırleri bar.
Bir bólmeli 8 jáne eki bólmeli 7 páter Qabanbaı batyr dańǵyly boıyndaǵy «TENGRI» jáne E-36 kóshesindegi «Respublika» turǵyn úı keshenderinde ornalasqan.
Astana ákimi jańa qonystanýshylardy Naýryz meıramymen quttyqtap, TJD-nyń árbir qyzmetkeri azamattardyń qaýipsizdigi men qorǵaýyn qamtamasyz etýde mańyzdy ról atqaratynyn atap ótti.
- Memleket basshysynyń tapsyrmasy boıynsha TJM-men birlesip, eńbek jaǵdaıyn jáne turǵyn úı jaǵdaıyn jaqsartý boıynsha jumys isteımiz. Máselen, turǵyn úı jaǵdaıyn jaqsartý úshin turǵyn úı baǵdarlamasyna qatysýshylar sanatyn (Qazaqstandyq turǵyn úı kompanııasy) keńeıttik, jastarǵa arnalǵan arnaıy turǵyn úı baǵdarlamasyn iske qostyq, onda TJD qyzmetkerleriniń sanatyn arnaıy jeke qarastyrdyq. Sol sııaqty Departament qyzmetkerleri úshin turǵyn úı sertıfıkatynyń mólsheri 1 mln teńgeden 1,5 mln teńgege deıin ulǵaıtyldy. Sońǵy úsh jylda TJD qyzmetkerlerine 90 páter berildi, - deıdi Jeńis Qasymbek.
Onyń aıtýynsha, ótken aıda Kóktal eldi mekeninde órt sóndirý deposy ashylǵan. Onyń aýmaǵynda elordalyq garnızon qyzmetkerleri úshin 18 qyzmettik páterge arnalǵan jataqhana qarastyrylǵan.
Sonymen qatar, qazir órt sóndirý deposy Úrker eldi mekeninde salynyp jatyr. Telman jáne Internatsıonalnyı eldi mekenderinde, sondaı-aq 28-shi kóshede taǵy úsh bólimshe josparlanǵan.
Ótken jyly departamenttiń avtoparki 21 tehnıkamen tolyqty.
