«Naýryz» ıpotekasyna alǵashqy úsh saǵat ishinde 2218 ótinim túsken

ASTANA. KAZINFORM – Otbasy bank «Naýryz» baǵdarlamasy men «Naýryz Jumysker» baǵytyna ótinim qabyldaý qalaı júrip jatqany týraly málimet taratty.

- «Naýryz» baǵdarlamasyna ótinim qabyldaý 2025 jyldyń 1 jeltoqsanyna deıin jalǵasady. Baǵdarlamaǵa alǵashqy úsh saǵattyń ishinde barlyǵy 2218 qazaqstandyq ótinim berdi. Onyń ishinde 813 ótinim alǵashqy saǵatta sátti tirkelse, qalǵan 1128 ótinim qazir qaralý ústinde. Qazaqstandyqtar «Naýryz» baǵdarlamasymen páter alý úshin kóbinese Astana, Almaty Shymkent qalalaryn tańdap jatyr, - dep jazylǵan resmı aqparatta.

Baǵdarlama boıynsha ótinim bergenderdiń 73%-y 35 jasqa deıingi jastar.

- Jalpy ótinim berýshiniń portreti mynadaı: bul – kámeletke tolmaǵan balalary bar otbasyly adam. «Naýryz» baǵdarlamasyna barlyq qazaqstandyq qatysa alady. Olardyń qatarynda áleýmettik osal toptardyń ókilderi (turǵyn úı kezeginde turǵandar), jumys isteıtin jastar, jas otbasylar, turǵyn úı tólemin alýshylar, Otbasy bank salymshylary, sondaı-aq monoqalalardyń, aýdan ortalyqtarynyń jáne aýyldardyń turǵyndary bar, - dep jazady bank mamandary.

Baǵdarlamaǵa qatysý úshin kelesi talaptarǵa saı bolý qajet:

- Otbasy bankte depozıttiń bolýy. (Depozıttiń ashylǵan ýaqyty mańyzdy emes).

- Otbasy banktegi jınaq shotynda keminde 2 mıllıon teńge bolýy. Bul somany baǵdarlamaǵa ótinim berer aldynda bir rettik jarna retinde salýǵa bolady.

- Sońǵy 5 jyl ishinde qatysýshynyń jáne onyń otbasy músheleriniń atynda turǵyn úı bolmaýy tıis. Otbasy múshelerine – erli-zaıyptylar men olardyń kámeletke tolmaǵan balalary jatady.

- Sońǵy 6 aıda resmı tabystyń bolýy.

Otbasy bank tóraǵasy Lázzat Ibragımovanyń málimetine súıensek, 2025 jyldyń on aıynda «Naýryz» baǵdarlamasy men «Naýryz Jumysker» baǵyty 6 920 qazaqstandyqqa jańa páterge kóshýge múmkindik bergen.

Ótinim qabyldaý merzimi aıaqtalǵannan keıin baldar eseptelip, ári qaraı nesıe berýge qatysatyn qatysýshylar tizimi qalyptasady. Ball esepteý protsesi avtomatty rejımde júrgiziledi.

Ball esepteý krıterııleri:

HÁAQ (áleýmettik turǵynda az qamtylǵan sanat) tobynyń mártebesiniń bolýy – 10 ball;

- Balalarynyń bolýy – 10 ball, sanyna qaramastan;

- Tirkelgen nekeniń bolýy – 5 ball, nekeniń uzaqtyǵyna qaramastan;

- Qatysýshynyń jasy 35 jasqa deıin (qosa eseptegende) – 5 ball;

- JSS salymyndaǵy syıaqy mólsheri – ár 1 000 teńgege 1 ball.

- «Naýryz Jumysker» baǵdarlamasy boıynsha ótinimder 2025 jyldyń 3 qarashasynan bastap qabyldanady. Bul baǵyt boıynsha konkýrs joq. Qatysýshyǵa jumys orny boıynsha anyqtama alý jetkilikti, onda jumys berýshiniń qyzmet túri, laýazymy jáne mamandyǵy kórsetiledi, sodan keıin ótinimin jaqyn ornalasqan Otbasy bank bólimshesine tapsyrýǵa bolady.

Jumys oryndarynyń ataýlary, kásiporyndardyń ekonomıkalyq qyzmet túrleri jáne jumys orny anyqtamasynyń úlgisi banktiń resmı saıtynda jarııalanǵan. Jalpy, bul baǵdarlama 1 143 qyzmet túrin jáne 8 230 jumys mamandyǵyn qamtıdy.

«Naýryz» baǵdarlamasy men «Naýryz Jumysker» baǵytynyń sharttary birdeı:

Bastapqy jarna: alǵashqy naryqtaǵy daıyn páterdi satyp alǵanda – keminde 10%; alǵashqy naryqtaǵy qańqalyq (chernovaıa) páterdi nemese ekinshi naryqtaǵy páterdi satyp alǵanda – keminde 20%;

Turǵyn úı kezeginde turǵan áleýmettik osal toptarǵa nesıe boıynsha syıaqy mólsherlemesi: 7% (JTSM 7,1%-dan 9,6%-ǵa deıin);

Barlyq azamatqa nesıe boıynsha syıaqy mólsherlemesi: 9% (JTSM 9,4%-dan 13%-ǵa deıin);

Nesıe merzimi: 19 jylǵa deıin.

«Naýryz» baǵdarlamasy jáne «Naýryz Jumysker» baǵyty boıynsha turǵyn úı satyp alý kezinde usynylatyn sharttar:

Alǵashqy naryqtaǵy turǵyn úı, onyń ishinde KJK kepildigi jáne saqtandyrý quralymen úlestik qatysý sharty boıynsha;

Ekinshi naryqtaǵy turǵyn úı monoqalalar men aýyldyq eldi mekenderde ǵana, biraq jyldyq bólingen qarajat kóleminiń 30%-ynan artyq emes.

Nesıe boıynsha eń úlken soma:

- Almaty men Astana úshin – 36 mln teńgege deıin;

- Basqa óńirler úshin – 30 mln teńgege deıin.

Sonymen qatar bir nesıe boıynsha satyp alynǵan alǵashqy naryqtaǵy páterdi jóndeýge qarajat alýǵa bolady. Jóndeýge arnalǵan nesıe somasy páterdi satyp alý úshin alynǵan nesıe somasynyń 20%-ynan aspaýy tıis.

Baǵdarlama qatysýshylary alǵashqy naryqtaǵy turǵyn úıdi Baspana Market portaly (otbasybank.kz) arqyly tańdap, brondap, satyp ala alady.

Bul platformaǵa ornalastyrmas buryn, árbir obekti aǵymdaǵy naryq baǵalary negizinde baǵanyń kelisý protsesinen ótedi. Eger baǵa naryqqa sáıkes kelse, sol obektiniń qurylysshysymen turǵyn úıdi satý boıynsha kelisimshart jasalady jáne 1 sharshy metrge baǵa bekitiledi. Bul turǵyn úı baǵdarlamasy bastalǵan kezde baǵalardyń jasandy ósýine jol bermeýge múmkindik beredi.

Qazirgi ýaqytta platformada tańdaý úshin shamamen 627 nysannan 10 069 páter usynylǵan.

Buǵan deıin «Naýryz» baǵdarlamasy: 35 jasqa deıingi úmitkerlerge qosymsha upaı beriletinin jazǵan edik.