«Naýryz» baǵdarlamasynyń ekinshi kezeńi iske qosylady — Otbasy bank

ASTANA. KAZINFORM — Aldaǵy naýryz aıyna deıin «Naýryz» baǵdarlamasynyń ekinshi kezeńi iske qosylady. Bul týraly Kazinform agenttiginiń saýalyna Otbasy banktiń resmı jaýabynda aıtylǵan.

— 2025 jyldyń birinshi toqsanynda «Naýryz» baǵdarlamasynyń ekinshi kezeńin iske qosý josparlanyp otyr. Ol jańa sharttarmen jumys isteıtin bolady. Baǵdarlamadaǵy ózgeris depozıttegi jınaqtalǵan qarajattyń eń tómengi somasyna qatysty. Endi «Naýryz» baǵdarlamasyna qatysýǵa ótinim berý úshin jınaqta keminde 2 mıllıon teńge bolýy qajet, — delingen habarlamada. 

Bank bul shara baǵdarlamaǵa halyqtyń úlken suranysyna baılanysty qolǵa alynǵanyn jáne ol qatysýshylar arasynda ádil irikteýdi arttyrýǵa baǵyttalǵanyn atap ótken. ıAǵnı turǵyn úı jaǵdaıyn jaqsartýǵa shynaıy maqsat qoıǵan jáne eń tómengi bastapqy jarnany jınaýǵa qaýqary bar salymshylarǵa kóbirek múmkindik beriledi.

Odan bólek, «Naýryz» baǵdarlamasy boıynsha alǵashqy jarnaǵa qatysty da ózgeris engiziletini aıtylǵan.

— Endi taza árleýdegi turǵyn úıdi tańdaı otyryp, baǵdarlamaǵa qatysýshylarǵa qaryz somasynyń 10% mólsherinde, biraq keminde 2 mıllıon teńge bastapqy jarna tóleýi jetkilikti. Bul ózgeris qurylys kompanııalaryn satýǵa qoıylǵan taza árleýdegi turǵyn úılerdiń sanyn arttyrýǵa yntalandyrady, — delingen habarlamada.

Aıta keteıik, buǵan deıin «Otbasy bank» AQ basqarma tóraıymy Lázzat Ibragımova «Naýryz» baǵdarlamasyna 2025 jyly 300 mlrd teńge bólý josparlanǵanyn aıtqan bolatyn.