«Naýryz» baǵdarlamasynda óńirlerge jeke lımıt engizilýi múmkin
ASTANA. KAZINFORM — Qazaqstanda «Naýryz» ıpotekalyq baǵdarlamasy aıasynda jekelegen óńirlerge arnaıy páter lımıtin belgileý usynyldy. Bul týraly «Otbasy bank» AQ basqarma tóraıymy Lázzat Ibragımova aıtty.
Onyń sózinshe, sońǵy úsh jylda baǵdarlamaǵa qatysýshylardyń basym bóligi Astana, Almaty jáne Shymkent qalalarynan baspana alýdy tańdaǵan. Bul ózge óńirlerde turǵyn úı naryǵyn damytý úshin qosymsha qoldaý sharalary qajet ekenin kórsetedi.
— «Naýryz» baǵdarlamasy arqyly jyl saıyn 8–10 myń jas otbasy baspanaly bolady. Sońǵy úsh jylda qatysýshylardyń 60 paıyzy, keıde tipti 70 paıyzy Astana, Almaty jáne Shymkent qalalaryn tańdaıdy. Bul shamamen 5–6 myń otbasy. Al Jezqazǵan sııaqty qalalar úshin 100 nemese 200 páterge jeke lımıt qarastyrýǵa bolar edi, — dedi Lázzat Ibragımova.
Bank basshysy jaqynda Ulytaý oblysyna jasaǵan saparynda Jezqazǵandaǵy turǵyn úı qorynyń eskirgenine nazar aýdarǵanyn jetkizdi. Onyń pikirinshe, mundaı qalalarda jańa turǵyn úıler salý halyqtyń turmys sapasyn jaqsartýǵa múmkindik beredi.
— Jezqazǵanda másele tek qalaǵa jańa turǵyndardyń kelýinde emes. Eń aldymen, osy jerde jumys isteıtin adamdardyń ómir súrý sapasyn arttyryp, olarǵa turǵyn úıdiń jańa standartyn usyný mańyzdy. Sondyqtan mundaı óńirlerge arnaıy qoldaý sharalary qajet, — dedi ol.
Lázzat Ibragımova óńirlerge jeke lımıt bólý turǵyndardyń óz qalasynan baspana alýyna múmkindik berip, jergilikti turǵyn úı naryǵyndaǵy suranysty arttyrýǵa yqpal etetinin atap ótti.
Aıta keteıik, buǵan deıin turǵyn úıdi qarjylandyrýdyń jańa joldary qarastyrylyp jatqany habarlandy.
