«Naýryz» baǵdarlamasy: iri qalalarda ekinshi naryqtan úı alýǵa ruqsat berile me
ASTANA. KAZINFORM — «Naýryz» ıpotekalyq baǵdarlamasy aıasynda Astana, Almaty jáne oblys ortalyqtarynda ekinshi naryqtan baspana satyp alýǵa múmkindik berý ázirshe qarastyrylyp jatqan joq. Bul týraly OKQ qyzmetinde ótken baspasóz májilisinde QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov málimdedi.
Qazir baǵdarlama aıasynda Astana, Almaty jáne oblys ortalyqtarynda tek birinshi naryqtaǵy, ıaǵnı jańa turǵyn úılerdi satyp alýǵa bolady. Al monoqalalar men aýyldy eldi mekenderde birinshi jáne ekinshi naryqtaǵy baspanany satyp alýǵa múmkindik bar.
Brıfıng barysynda jýrnalıster azamattar arasynda «Naýryz» baǵdarlamasymen ekinshi naryqtaǵy daıyn baspanany satyp alýǵa múmkindik berý jóninde usynystar bar ekenin aıtyp, mundaı ózgeris engizý josparda bar-joǵyn surady.
Baqytjan Júnisbekov ázirshe mundaı ózgeris qarastyrylyp jatpaǵanyn aıtty.
Aıta keteıik, «Naýryz» baǵdarlamasy boıynsha áleýmettik osal toptarǵa 7 paıyzben, al basqa azamattarǵa 9 paıyzben ıpoteka beriledi. Baǵdarlama aıasynda jyl saıyn 12 myń qaryz beriledi. Bıylǵy segiz aıda 11,9 myń qaryz berilip, onyń jalpy somasy 350 mıllıard teńgeni qurady.
Eske salaıyq, buǵan deıin Qazaqstanda turǵyn úıge muqtaj azamattarǵa 2 jáne 5 paıyzdyq jeńildetilgen ıpoteka beriletini jóninde jazdyq. Bıyl osy baǵytta 12,6 myń qaryz berý josparlanǵan. Oǵan 175,1 mıllıard teńge qarastyrylǵan.
