«Naýryz» baǵdarlamasy: Baspanaly bolý úshin 2 mln teńge jınaq jetkilikti me
ASTANA. KAZINFORM — Qazaqstanda kópten kútken «Naýryz» turǵyn úı baǵdarlamasyna ótinim qabyldaý bastaldy. 31 naýryzǵa deıin jalǵasatyn naýqan aıasynda myńdaǵan otandasymyz jeńildetilgen shartpen baspanaly bolýdy kózdep otyr. Baǵdarlamanyń qyr-syry, tabys kózin rastaý tártibi jáne bıylǵy erekshelikter týraly ıpoteka sarapshysy Aqerke Bodaýbekqyzy «Jibek Joly» telearnasynyń «Bugin.LIVE» baǵdarlamasynda egjeı-tegjeıli aıtyp berdi.
Baǵdarlamanyń sharty boıynsha, nesıe mólsherlemesi — 9%, al halyqtyń áleýmettik jaǵynan osal toptary úshin — 7%. Ótinim berý úshin «Otbasy banktegi» shotta keminde 2 mln teńge jınaq bolýy shart. Alaıda sarapshynyń aıtýynsha, bul qarajat tek konkýrsqa qatysýǵa ǵana múmkindik beredi.
— Kóp azamattar 2 mln teńge bolsa jetkilikti dep oılaıdy. Biraq konkýrstan ótken soń, úı qunynyń 20%-yn toltyrý qajet. Mysaly, 30 mln teńgege úı alsańyz, shotyńyzda 6 mln teńge bolýy tıis. Eger baspana jóndeýsiz (chernovoı) bolsa 20%, al jóndeýimen (chıstovoı) bolsa 10% bastapqy jarna talap etiledi. Sonymen qatar, Naýryz baǵdarlamasynyń artyqshylyǵy — jóndeý jumystaryna úı qunynyń 10-15%-y kóleminde qosymsha qarajat shyǵaryp alýǵa bolady, — deıdi Aqerke Bodaýbekqyzy.
Sarapshynyń aıtýynsha, baǵdarlamadan ótý múmkindigin arttyratyn basty faktor — banktegi jınaqqa túsetin syıaqy mólsheri. Neǵurlym qarajat erterek jáne kóbirek jınalsa, ball soǵurlym joǵary bolady. Sonymen qatar, tabys kózin rastaý kezeńinde kóptegen azamattar kedergige tap bolyp jatady.
— Tabysty rastaý kezinde ár balanyń sany men qoldanystaǵy nesıeler shyǵyn retinde esepteledi. Sondyqtan ıpotekaǵa ótinim bermes buryn barlyq nesıeni jaýyp, japqany jóninde anyqtama alý mańyzdy. Eger bıyl ótpeı qalsańyz, qaımyqpańyz. Baǵdarlama 7 jylǵa eseptelgen, alda áli 4 jyl bar. Osy ýaqytty qarjylyq saýattylyqty arttyryp, aqsha jınaýǵa arnaǵan jón, — dep keńes berdi maman.
Sondaı-aq, «Naýryz jumysker» baǵyty boıynsha 8000-nan astam kásip ıeleri men belgili bir EQJJ (Ekonomıkalyq qyzmet túrleriniń jalpy jikteýishi) kodtary bar mekeme qyzmetkerlerine de jeńildikter qarastyrylǵan. Bul tizimdi banktiń resmı saıtynan tekserýge bolady.
Memleket tarapynan bul jobaǵa jylyna 300 mlrd teńge bólinip otyrady. Bul degenimiz jyl saıyn kemi 12 myń otbasy óz úıiniń kiltin alady degen sóz.
Aıta keteıik, buǵan deıin, Otbasy bankke osal sanattarǵa kóńil bólý tapsyrylǵan edi.
