Naýryz aıynda ótetin UBT bastaldy

ASTANA. KAZINFORM – Búgin naýryz aıynda ótetin UBT bastaldy, ol 6 sáýirge deıin jalǵasady.

Ǵylym jáne joǵary bilim mınıstrligi Ulttyq testileý ortalyǵynyń málimetinshe,163 myńǵa jýyq adam UBT-ǵa qatysýǵa ótinish bergen. Olardyń 76%-y qazaq tilinde, 23,9%-y orys tilinde, 162 adam aǵylshyn tilinde testileýden ótýge ótinish bildirdi.

Talapkerler ótinish berý barysynda olar testileý kúnin, ýaqytyn jáne pýnktin ózderi tańdady. Testileýdiń birinshi kúni elimiz boıynsha 775 adam UBT tapsyrady.

Eń kóp tańdalǵan beıindik pánder kombınatsııasy – «Bıologııa-Hımııa», ıaǵnı talapkerlerdiń 17,5%-y medıtsına, pedagogıka jáne aýyl sharýashylyǵy mamandyqtaryna túsýdi josparlaǵan. Al 17,1%-y «Matematıka-Fızıka», 10,5%-y «Matematıka-Informatıka» pánderin tańdady, sáıkesinshe bolashaq ınjenerler men IT-mamandary.

UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha. UBT tapsyrmalar sany – 120. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrmadan. Joǵary ball – 140.

Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.

Esterińizge sala ketsek, naýryzdaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan.

Ótken jylǵy mektep jáne kolledj túlekteri, QR azamaty bolyp tabylmaıtyn ulty qazaq tulǵalar, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.

Naýryz aıynda ótetin UBT-ǵa ótinish qabyldaý bastalǵanyn jazǵan bolatynbyz.