Naýryz aıynda kún raıy qandaı bolady
ASTANA. KAZINFORM — Konsýltatıvtik sınoptıkalyq boljamǵa sáıkes, 2026 jylǵy naýryz aıy jyly ári jaýyn-shashyndy bolady dep kútiledi.
Aýa temperatýrasy respýblıkanyń basym bóliginde klımattyq normadan shamamen 1°S joǵary, al ońtústik-shyǵys bóliginde normaǵa jýyq bolady (Jetisý oblysynyń basym bóliginde, Almaty jáne Shyǵys Qazaqstan oblystarynyń ońtústik-shyǵys jartysynda, Abaı oblysynyń qıyr ońtústik-shyǵysynda).
Jaýyn-shashyn mólsheri respýblıkanyń basym bóliginde normadan kóp, al Aqtóbe, Ulytaý oblystarynda, Mańǵystaý, Qostanaı, Aqmola, Qaraǵandy, Qyzylorda oblystarynyń basym bóliginde, Batys Qazaqstan men Atyraý oblystarynyń shyǵysynda, Túrkistan jáne Jambyl oblystarynyń soltústiginde normaǵa jýyq bolady dep boljanady.
Aı boıy Qazaqstan boıynsha aýa raıy qubylmaly sıpatta bolady. Jaýyn-shashyn túsedi, keı kúnderi nóser bolady: eldiń soltústik jartysynda negizinen qar túrinde, batys jáne ońtústik jartysynda jańbyr jáne jańbyr aralas qar túrinde. Jel kúsheıip, boran soǵyp, tuman basyp, kóktaıǵaq bolady.
Naýryz aıynyń birinshi jartysynda aıazdy kúnder men jylymyqtyń almasýy baıqalady.
Qazaqstannyń soltústik, shyǵys jáne ortalyq óńirlerinde naýryz – «qystyń jalǵasy» bolyp sanalady: qysqa tán sýyq aýa raıy bolady. Qar jaýyp, boran soǵyp, kóktaıǵaq bolyp, tuman túsedi.
Degenmen keıbir kúnderi kóktemniń lebi seziledi. Birinshi onkúndikte túngi temperatýra -28-38°S-tan -5-10°S-qa deıin, kúndiz -10-20°S-tan 0,-8°S-qa deıin birtindep joǵarylaıdy. Onkúndiktiń sońynda temperatýra qaıta tómendeıdi.
Batys óńirlerde de naýryz aıy qubylmaly, kóktemge tán ózgermeli bolady. Aı boıy sýytý men jylyný kezeńderi almasyp otyrady. Birinshi onkúndikte túnde -5-15°S-tan 0,-5°S-qa deıin, kúndiz 0,-8°S-tan -3+7°S-qa deıin aýytqıdy.
Ońtústik jartysynda birinshi onkúndikte túngi temperatýra -8+2°S-qa deıin, kúndiz +5+15°S-qa deıin birtindep joǵarylaıdy.
Aıdyń ekinshi jáne úshinshi onkúndikterinde soltústik, ortalyq jáne shyǵys óńirlerde túnde -3+2°S-tan -8-15°S-qa deıin, keı jerlerde -20-25°S-qa deıin, kúndiz +5+13°S-tan 0,-8°S-qa deıin aýytqý kútiledi. Ońtústik-batys jáne ońtústik óńirlerde keı kúnderi kúndiz +13+22°S-qa deıin, al qıyr ońtústikte +27°S-qa deıin jylynady. Antıtsıklon yqpalymen qysqa merzimdi sýyq tolqyndary bolýy múmkin.