Naýryz aıynan beri bankrottyq boıynsha 70 myń ótinish kelip tústi

9 mlrd teńgeden astam borysh somasyna 6,4 myń adam bankrot dep tanyldy. Bul týraly Qarjy vıtse-mınıstri Erjan Birjanov málim etti, dep habarlaıdy Kazinform.

«Bıylǵy 3 naýryzdan bastap Qazaqstan boıynsha 70 myńǵa jýyq ótinish kelip tústi. Osy ótinishterdi qarastyrý aıasynda 9 mlrd teńgeden astam borysh somasyna 6,4 myń adam bankrot dep tanyldy. Sonyń arasynda 3,5 myń adamda qaryzynyń merzimi 5 jyldan asyp ketken, ıaǵnı problemaly qaryzdar sanatyna ótken», - dedi E. Birjanov Ortalyq kommýnıkatsııalar qyzmetindegi baspasóz máslıhatynda.

Vedomstvo málimetine qaraǵanda, joldanǵan 70 myń ótinishtiń 80 paıyzdan astamy bankrottyq rásimge sáıkes kelmeıtini anyqtaldy (56,4 myń ótinish).
Negizgi sebepteri: jeke basynda múliktiń bolýy, boryshkerdiń qaryz somasy men tólem merzimi boıynsha derekteriniń sáıkessizdigi, sondaı-aq kredıtormen qaryzdy óteý talaptarynyń durys rettemelmeýi.

Atap aıtqanda, qazir elimizde neǵurlym suranysqa ıe bolyp otyrǵany - sottan tys bankrottyq rásimi. Ony tek bankter, mıkroqarjy uıymdary jáne kollektorlyq agenttikter aldyndaǵy qaryzdar boıynsha qoldanýǵa bolady. Azamattar ótinishterdi Halyqqa qyzmet kórsetý ortalyqtarynda, elektrondyq úkimet portaly arqyly (eGov.kz.), sondaı-aq E-salyq Azamat nemese eGov Mobile mobıldi qosymshalary arqyly bere alady. Jeke tulǵalardyń bankrottyǵy boıynsha «Qoldau» dep atalatyn jańa aqparattyq júıe iske qosyldy.

«Bankrot dep tanylǵan adamdardyń kóbisi Almaty oblysynda (801 adam), Jambyl oblysynda (677) jáne Almaty qalasynda (606) tirkeldi. Al eń azy Ulytaý oblysynda, ıaǵnı 41 adam bankrot dep tanyldy», - dedi vıtse-mınıstr.

Sot arqyly bankrottyq jáne tólem qabilettiligin qalpyna keltirý rásimin qoldaný úshin sottarǵa 1 200-ge jýyq azamat júgingen.