Naýryz-2026: Elorda halqyn ınteraktıvti merekelik alańdar tańǵaldyrdy
Astanada Naýryz meıramy aýqymdy túrde atalyp ótip, dástúr men zamanaýı tehnologııanyń úılesimimen qala turǵyndaryn tańǵaldyrdy. Elordada jarqyn alańdar, ınteraktıvti kıiz úıler, tsıfrlyq ekspozıtsııalar jáne jasandy ıntellekt elementteri bar erekshe oıyn-saýyqtar uıymdastyryldy. Bul týraly Astana qalasynyń ákimdigi málim etti.
Qalanyń ár aýdanynda arnaıy taqyryptaǵy kıiz úıler ashylyp, olardyń árqaısysy jeke tehnologııalyq alańǵa aınaldy. Máselen, bir kıiz úıde qonaqtar ınteraktıvti dıspleı arqyly Naýryz týraly suraqtarǵa jaýap beretin jasandy ıntellekt avatarymen tildese aldy.
Basqa kıiz úılerde kelýshiler VR-kózildirikterdiń kómegimen vırtýaldy keńistikke enip, Qazaqstan boıynsha vırtýaldy saıahat jasap, ulttyq oıyndardy baıqap kórdi.
Erekshe nazar «Zań men tártip» kıiz úıine aýdaryldy. Munda polıtseı drony men robot-ıt tanystyrylyp, Tazabek ınteraktıvti keıipkeri usynyldy.
Elordadaǵy ózge alańdarda da tehnologııalar merekelik atmosferanyń ajyramas bóligine aınaldy. «Atatúrik» saıabaǵynda qonaqtar jasandy ıntellekt arqyly ulttyq kıimdegi tsıfrlyq portretter jasap, «Naýryzaı» jáne «Naýryzbek» AI-keıipkerlerimen tildese aldy.
Saryarqa aýdanynda turǵyndar VR arqyly Qazaqstanǵa vırtýaldy saıahat jasap, robototehnıka salasyndaǵy jańalyqtarmen tanysty. Olardyń qatarynda gýmanoıd robottar men shapan kıgen bı bıleıtin robot ta bar.
Sondaı-aq EXPO alańynda usynylǵan «Uly Dala arýy» art-ınstallıatsııasy erekshe nazar aýdartty. Biregeı týyndy sheber Rahıma Bergenniń jetekshiligimen júzdegen qala turǵynynyń qolymen jasalǵan. Jobaǵa balalardan bastap ájelerge deıin qatysyp, olar 3250 sharshy toqyp, Qazaqstannyń barlyq óńirin beıneleıtin 17 kún shapaǵyn qurastyrdy. Bul ınstallıatsııa tek fotoaımaq qana emes, urpaqtar sabaqtastyǵy men ortaq shyǵarmashylyqtyń sımvolyna aınaldy.
Sonymen qatar, keıbir alańdarda sporttyq jarystarda tóreshilik etý jáne nátıjelerdi tirkeý jumysy jasandy ıntellekt kómegimen júzege asyryldy.
Halyqaralyq EXPO kórme ortalyǵynda qonaqtarǵa arnalǵan túrli is-sharalar uıymdastyryldy: 12 metrlik LED-týnnel, tsıfrlyq ınteraktıvti aımaqtar, gastronomııalyq pavılondar, AI Sport sporttyq aımaǵy jáne «Jeti qazyna» golografııalyq ekspozıtsııasy.
Sonymen qatar, merekeniń dástúrli mazmuny da óz ornyn saqtady: qonaqtar ulttyq taǵamdardan dám tatyp, salt-dástúrge toly is-sharalarǵa qatysyp, etno-folklorlyq ansamblderdiń ónerin jáne qazaqstandyq estrada juldyzdarynyń kontsertterin tamashalady.
Al «Qazaq eli» monýmenti mańynda ótetin áserli keshki dron-shoý merekeniń kórkin arttyra tústi. Munda aspandaǵy jaryq kompozıtsııalary zamanaýı tehnologııalardy qazaq mádenıetiniń sımvoldarymen úılestiredi.
Elordadaǵy merekelik is-sharalar 22 naýryz kúni de jalǵasady. Qala turǵyndary men qonaqtaryna arnap jańa ınteraktıvti is-sharalar men mádenı baǵdarlamalar uıymdastyrylady.
Eske sala keteıik, «Naýryznama» onkúndigi aıasynda qalada 200-den astam is-shara ótip jatyr – kontsertter, ulttyq oıyndar, jármeńkeler, master-klasstar men áserli salt-dástúr kórsetilimderi.
Buǵan deıin elordada ulttyq taǵamdar jármeńkesi ótip jatqanyn jazdyq.