Naýqastyń ólimine sebepshi bolǵan hırýrgqa shyqqan sot úkimi ózgerissiz qaldy
ALMATY. QazAqparat - Almatyda apellıatsııalyq sot plastıkalyq hırýrg Dmıtrıı Pısarevke shyǵarylǵan sot úkimin ózgerissiz qaldyrdy, dep habarlaıdy QazAqparat tilshisi sot zalynan.
Hırýrgtyń ota ústelinde byltyr eki áıel kóz jumǵan bolatyn. Dáriger 3 mln teńge bolatyn moraldyq shyǵyn kólemin 500 myńǵa deıin tómendetý týraly apellıatsııalyq shaǵym túsirgen edi. Ol aqshasynyń joqtyǵyna baılanysty bul qarajatty jınap bere almaıtynyn aıtty.
Sonymen qatar, ol sot úkimin qaıta qarap, ózin aqtaýdy surady.
«Osy iske qatysym bar ekenin seziný maǵan óte qıyn. Sot úkimi shyqty. Men endi otbasymdy asyraı almaımyn. Men dárigermin, basqa eshqandaı jumyspen aınalysa almaımyn. Sot sheshimin qaıta qarap, meni aqtaýyńyzdy ótinem», - dedi hırýrg Dmıtrıı Pısarev.
Shaǵymdy qaraǵan apellıatsııalyq kollegııa Almaty aýdandyq sotynyń 29 jeltoqsandaǵy úkimin ózgerissiz qaldyrdy.
«Biz sizdiń aıybyńyz tolyq dáleldendi dep sanaımyz. Sizdi aqtap alýǵa eshqandaı negiz joq», - dedi kollegııa músheleri.
Esterińizge sala keteıik, Ýkraına azamatshasy Dana Agamuradova Almatyda ish maıyn alǵyzý úshin jekemenshik emhanalardyń birinde ota jasatqan. Otadan soń 6 saǵat ótkende Dana esin jımastan kóz jumdy. Dárigerlerdiń aıtýynsha, patsıent maı túıirshikteriniń ókpe tamyrlaryn bitep qalýynan qaıtys boldy. Oǵan otany plastıkalyq hırýrg Dmıtrıı Pısarev jasaǵan bolatyn. Dál osy hırýrgtyń qolynan byltyr qarashada taǵy bir áıel ómirden ozdy. 30 jastaǵy Laýra Іzbasarova plastıkalyq ota jasatyp, omyraýyn tarttyrmaq bolǵan. Bul qylmystyq oqıǵany da polıtsııa tekserýge aldy.
Almaty qalalyq qoǵamdyq densaýlyqty saqtaý departamenti plastıkalyq hırýrg Dmıtrıı Pısarevtiń klınıkalyq em jasaýyna sot arqyly tyıym saldy.
Kóp uzamaı Almatyda taǵy bir áıeldiń plastıkalyq otadan qaıtys bolǵany belgili boldy. 44 jastaǵy áıelge otany «Moskva deLux» emhanasynyń hırýrgy Roman Alferov jasaǵan.
