Naýqastyń aman qalýy jedel járdem qyzmetine tikeleı baılanysty - Eljan Birtanov

Sharada Reseı, Izraıl, Qytaı jáne Malaızııadan kelgen mamandar óz tájirıbelerimen bólisti. Izraıldik mamandar tótenshe oqıǵada zardap shekkendermen jumys isteý tásilderin kórsetse, Qytaı mamandary - jańa tehnologııalar jóninde áńgimeledi. Malaızııalyqtar naýqasty emdeýge kómektesetin shópter týraly, reseılikter - júrek-ókpe reanımatsııasy týraly baıandady.
  

Sheberlik sabaǵyna QR Densaýlyq saqtaý mınıstri Eljan Birtanov ta qatysty.

«Men úshin jedel medıtsınalyq kómek - bazalyq mamandyq. Basymdyq beretin jeke kásibı maqsatym da - elimizdegi jedel járdem qyzmetin jetildirý. Búginde dál osy shuǵyl medıtsınalyq kómek máseleleri asa ózekti bolyp otyr. Halyqtyń ómir súrý jasyn uzartý - memleket damýyndaǵy, densaýlyq saqtaý júıesindegi strategııalyq ındıkatorlardyń biri bolyp tabylady. Sozylmaly aýrýmen nemese qarttyqpen baılanysy joq aıaqasty ólim bul kórsetkishke aıtarlyqtaı yqpal etedi. Ókinishke qaraı, bizdegi bul kórsetkish kóńil kónshiterlikteı emes. Elimizde jaraqattan, ýlanýdan jáne ózine ózi qol salýdan bolatyn ólim deńgeıi joǵary», - dedi mınıstr.   
 

Sonymen birge, mınıstr damyǵan eldermen salystyrǵanda Qazaqstanda aýrýhanaǵa deıingi nemese alǵashqy táýlikte qaıtys bolý deńgeıi joǵary ekenin atap ótti. E.Birtanov muny medıtsına qyzmetkerleriniń kásibıligimen emes, ınfraqurylymmen, jabdyqtaýmen, jedel járdem qyzmetin durys uıymdastyrýmen baılanysty ekenin jetkizdi.

«Kóptegen damyǵan elderde 40-50 jasta mıokard ınfarktinen qaıtys bolý sırek kezdesedi, al bizde bul oqıǵalar jıi oryn alady. Munda árıne, aldyn alý, aýrýdy erte anyqtaý máseleleri de bar. Biraq, túptiń túbinde shuǵyl jaǵdaı bolady jáne barlyǵy jedel járdem qyzmetkerlerine, qabyldaý bólimine tikeleı baılanysty bolady. Sondyqtan, ótken jyldan bastap, dál osy baǵyttaǵy jumystardy kúsheıttik. Jańa standarttar men buıryqtar qabyldadyq», - dep túıindedi Eljan Birtanov.