Naýqasty tepkilegen dáriger: Astanalyq basqarma aýrýhana kameralaryn baqylaýǵa alady
ASTANA. QazAqparat - Astanada dáriger naýqasty tepkilegen soń qalanyń Qoǵamdyq densaýlyq saqtaý basqarmasy barlyq aýrýhanalardaǵy beınekameralardy baqylaýǵa alady, dep habarlaıdy QazAqparat tilshisi.
Bul týraly Qoǵamdyq densaýlyq saqtaý basqarmasynyń basshysynyń orynbasary Álııa Rústemova Ortalyq temirjol aýrýhanasynda ótken brıfıngte málimdedi.
«Oqıǵa týraly tańerteń bildik jáne tez arada qyzmettik tekserýdi bastap kettik. Dárigerdiń áreketin durys dep eseptemeımiz. Jáne oǵan taǵy jol bermeý úshin barlyq medıtsına qyzmetkerlerimen jumys isteımiz. Odan bólek, basqarmaǵa qarasty barlyq aýrýhanadaǵy beınekameralardy baqylaýǵa alýdy uıǵardyq», - dedi Álııa Rústemova.
Óz kezeginde Ortalyq temir jol aýrýhanasynyń bas dárigeri Sergeı Demochkın naýqasty soqqyǵa jyqqan terapevt-dáriger týraly aıtyp berdi.
«Terapevt nebary 26 jasta. Bizdiń aýrýhanada úsh jyl jumys istegen, qatardaǵy dáriger. Jastyq qyzýmen mas naýqastyń áreketine shydamaǵan. Qyzmettik etıkany buzǵany úshin ony jumystan shyǵaramyz. Al onyń dıplomy men sáıkestik sertıfıkaty qalpynda qalady. Sebebi, oqıǵanyń naýqasty emdeýge qatysy joq. Dárigerlik qyzmette óreskel qatelik jibergenderge qyzmetin jalǵastyrýǵa tyıym salynady», - dep túsindirdi Sergeı Demochkın.
Eske sala ketsek, Instagram jelisinde jerde jatqan naýqasty dárigerdiń tepkilegeni kórsetilgen vıdeo taraǵan bolatyn. Onda oqıǵa «Astana qalasynyń №2 aýrýhanasynda» boldy dep jazylǵan. Alaıda bul derek rastalmady.
Keıinirek bul keleńsiz jaıt qaladaǵy Ortalyq temirjol aýrýhanasynda bolǵany anyqtaldy.
