Naýqastarǵa tegin beriletin dáriler týraly elektrondy anyqtamalyq jasaldy
ASTANA. 7 aqpan. QazAqparat /Jasulan Joldybaev/ - Naýqastarǵa tegin bosatylatyn dári-dármekter týraly málimetter anyqtamalyǵy elektrondy nusqada qoljetimdi boldy.
Bul týraly búgin «Respýblıkalyq densaýlyq saqtaý júıesin damytý ortalyǵy» RMK-niń dárilik aqparattyq ortalyǵynyń jetekshisi Aısulý Ahımova málim etti.
«Elektrondy anyqtama bizdiń saıtymyzda ornalastyryldy. Árbir azamat ınternet arqyly saıtqa kirip, dáriler týraly málimetterdi erkin rejimde oqı alady. Sonymen qatar qazirgi ýaqytta saıtta «keri baılanys» fýnktsııasy jasalýda. Ol arqyly ınternet paıdalanýshylar atalmysh taqyryp boıynsha ózderiniń naqty saýaldaryn qoıa alatyn bolady», - deıdi A. Ahımova.
Onyń atap ótkenindeı, anyqtamanyń basylym túrindegi nusqasy da jaryqqa shyqty. Búgingi tańda onyń 6 myń danasy basyp shyǵaryldy. Olar barlyq óńirlerge taratylyp, emhanalarǵa jáne alǵashqy býyndaǵy dárigerlerge beriledi.
Onyń aıtýynsha, birer jyldar buryn halyqty jáne dárigerlerdi qajet dárilik zatty qaıdan alýǵa bolatyndyǵy qyzyqtyratyn bolsa, qazir olardy dárilerdiń sapasy men dertke qarsy áseriniń tıimdiligi kóp qyzyqtarady.
«Sol sebepti ortalyq atalmysh anyqtamany jasaqtaý barysynda tegin jiberiletin dáriler týraly tolyq aqparatty qamtýǵa tyrysty», - deıdi A. Ahımova.
