Naýqastarǵa «Bolashaqtyń gospıtali» jobasy boıynsha joǵary bilikti medıtsınalyq kómek kórsetilýde
ASTANA. 9 qyrkúıek. QazAqparat - Jańashyl medıtsınalyq tehnologııalar men aldyńǵy qatarly emdeý ádisterin engizýdi qarastyrǵan «Bolashaqtyń gospıtali» jobasynyń aıasynda elimizdiń barlyq óńirlerinen kelgen naýqastarǵa joǵary bilikti medıtsınalyq kómek kórsetilýde,
dep habarlady pm.kz saıty.
Ulttyq medıtsınalyq holdıngtiń aqparaty boıynsha, 2012 jyldyń І jartyjyldyǵynda óńirlerden kelip holdıng emhanalarynda emdelgen naýqastardyń úlesi 71 paıyzdy qurady, bul 2011 jyldyń sáıkes kezeńindegi kórsetkishten 24 paıyzǵa kóp. Joǵary bilikti medıtsınalyq járdemniń úlesi 14 paıyzdy nemese 2538 qyzmetti qurady, byltyr bul kórsetkish 6 paıyzdy quraǵan bolatyn.
Oǵan qosa, jańadan 10 ınnovatsııalyq tehnologııa engizildi jáne sol tehnologııalar boıynsha qazirgi tańda 87 naýqasqa kómek kórsetildi. Jáne kúrdeli biregeı kardıohırýrgııalyq operatsııalar jasaldy. Atap aıtqanda, 2012 jyly Qazaqstanda alǵash ret naýqasqa donordyń júregin salý operatsııasy, jasandy júrek ornatý operatsııasy jasaldy.
Júrekke qan shyǵarmaı operatsııa jasaý ádisi ıgerilip, 6 naýqasqa osyndaı operatsııa jasaldy. Al omyrtqa julynyn neırostımýlıatsııalaý boıynsha jasalǵan operatsııa qazaqstandyq neırohırýrgııanyń úlken jetistigi boldy.
Sanıtarlyq avıatsııa ortalyǵy І jartyjyldyqta 353 ushý saparyn oryndap, sonyń arqasynda 464 patsıentke medıtsınalyq járdem der kezinde kórsetildi, 293 naýqas respýblıkalyq jáne oblystyq emhanalarǵa jetkizildi.
Ulttyq medıtsınalyq holdıng bazasynda óńirlik jáne ortalyq emhanalardyń medıtsınalyq qyzmetkerleri turaqty oqý kýrstarynan ótip, biliktilikterin jetildirip turady. Aǵymdaǵy jyldyń qańtar-maýsym aılarynda 1585 maman oqyp shyqty. Sondaı-aq holdıngtiń 1,7 myń mamany óz biliktilikterin jetildirdi, onyń ishinde 138 adam shetelde taǵlymdamadan ótip keldi. Búgingi tańda 64 dáriger oqýlaryn jalǵastyrýda.
І jartyjyldyqta holdıngtiń medıtsınalyq mekemelerinde 18 myńnan astam naýqas emdeldi, bul 2011 jylǵy kórsetkishten 3,5 myń adamǵa kóp. Oǵan qosa, 420 myńnan astam konsýltatıvtik-dıagnostıkalyq qyzmet kórsetildi, onyń ishinde tegin medıtsınalyq kómektiń kepildendirilgen kóleminiń aıasynda Respýblıkalyq dıagnostıkalyq ortalyqta 157,5 myń qyzmet kórsetildi.
«Bolashaqtyń gospıtali» jobasy «Salamaty Qazaqstan» baǵdarlamasynyń aıasynda júzege asyrylýda.
