Naýqastar men júkti áıelderge josparly tekserilý týraly SMS jiberiledi - DSM
Bul týraly QR Densaýlyq saqtaý vıtse-mınıstri Oljas Ábishev Úkimette ótken baspasóz máslıhatynda málimdedi.
«Elektrondy úkimet portalynda qulaqtandyrýǵa qatysty úsh qyzmet bar. Eger elektrondy úkimetke tirkelip, e-mail nemese sms túrindegi qyzmetti tańdasańyz jáne dıspanserlik naýqastar tiziminde bolsańyz, júıe avtomatty túrde josparly tekserilý týraly habarlama jiberip otyrady. Ekinshi qyzmet - júkti áıelderdi josparly tekserý jáne úshinshi qyzmet - josparly túrde emdeýge jatqyzý. Eger portalda belgili bir aýrýhanany kútý datasy qoıylsa, aqparat blokcheın tehnologııasy negizinde ózgertilmeıtin, redaktsııalanbaıtyn sıpatta saqtalady», - dep túsindirdi ol.
Sonymen birge, vıtse-mınıstr qazirgi ýaqytta «Aýrýhanaǵa jatqyzý bıýrosy» portalynyń naýqastarǵa qoljetimdi ekenin eske saldy.
«Bıýro portalynda JSN arqyly tegin medıtsınalyq kómek alý úshin sizdi qaı emhanaǵa, qaı aýrýhanaǵa jibergenin anyqtaýǵa bolady. Ózińizben sońǵy 10 kúnde jasalǵan zerthanalyq zertteý qaǵazyn jáne jeke kýálikti alyp júrý kerek. Kýáliktegi shtrıh-kod arqyly elektrondy júıeden joldama nemese josparly emdeýge jatqyzý týraly aqparattar alýǵa bolady», - dep óz sózin tolyqtyrdy Oljas Ábishev.
Eske sala ketsek, 2018 jyldyń 1 shildesinen bastap Qazaqstandaǵy medıtsınalyq uıymdar naýqastardy qaǵazsyz qabyldaýǵa kóshedi. Sáıkesinshe, naýqastarǵa ambýlatorııalyq kartalar men flıýrografııalyq jazbalardy alyp júrýdiń qajeti bolmaıdy.