Naýqastar qajetti dári-dármekti der kezinde alýy kerek — Úkimet basshysy
ASTANA. KAZINFORM — Medıtsınalyq uıymdar arasynda preparattardy tez arada qaıta bólýge nazar aýdarý kerek. Bul týraly Úkimet otyrysynda Premer-mınıstr Oljas Bektenov málim etti.
— Búginde elektrondyq retseptilerdi qoldaný men dárilik zattardyń berilýin tsıfrlyq rastaý aıasy aıtarlyqtaı keńeıip keledi, ıaǵnı, «Áleýmettik ámııan» arqyly qamtamasyz etý úlesi 80%-dan asty. Bul tetikti odan ári jetildire túsý kerek. Ol dárilik zattardyń esebin júrgizip qana qoımaı, emdelýshiniń ózine tıesili dárini naqty alýyna da kepildik beredi. Sondaı-aq dári-dármek tapshylyǵyn aldyn ala anyqtap, medıtsınalyq uıymdar arasynda preparattardy tez arada qaıta bólý jáne sol arqyly emdeý isinde úzilisterdi boldyrmaý óte mańyzdy, — dedi Oljas Bektenov.
Onyń aıtýynsha, satyp alynǵan dárilik zattar bola tura, emdelýshilerdiń olardy ýaqtyly ala almaýy nemese óz qarajatyna satyp alýy sııaqty jaǵdaılarǵa jol berýge bolmaıdy. Bul baǵytta tsıfrlandyrý qazirdiń ózinde naqty nátıje berip otyr. Tańbalaý júıesi dárilik zattardyń qozǵalysyn qadaǵalaýǵa, qalǵan kólemdi baqylaýǵa, zań buzý derekteri men jekelegen ónimderdiń tapshylyǵyn anyqtaýǵa múmkindik beredi.
— Emdelýshilerdi tolyqtaı qamtyp, bıýdjet qarajatynyń tıimdi jumsalýyn qamtamasyz etken jón. Naýqas adam ózine qajetti dári-dármekti mindetti túrde ári der kezinde alýy kerek. Bul jumystyń basty nátıjesi de — osynda, — dedi Úkimet basshysy.
Buǵan deıin otandyq dárilerdiń ishki naryqtaǵy úlesi 42%-ǵa jetti jazǵan edik.
