Naýqaspen baılanysta bolǵan adamǵa qashan vaktsına alýǵa bolady
NUR-SULTAN. QazAqparat – Koronavırýs juqtyrǵan naýqaspen baılanysta bolǵan adamdar 2 apta vaktsına almaı kútýi kerek. Bul týraly Respýblıkalyq dıagnostıkalyq ortalyqtyń klınıkalyq ımmýnologııa, allergologııa jáne pýlmonologııa bóliminiń meńgerýshisi, medıtsına ǵylymdarynyń doktory Elena Kovzel aıtty, dep habarlaıdy QazAqparat tilshisi.
«Koronavırýspen aýyrýy múmkin naýqaspen baılanysta bolsańyz, eki apta kútý usynylady. Sodan keıin ǵana vaktsına alýyńyzǵa bolady. Osy ýaqyttyń ishinde vırýstyń damymaǵanyn jáne ınfektsııa joq ekenin túsinýge bolady. Eki aptada ózgeris baıqalmasa, sizge PTR-test tapsyrý qajet emes degen sóz. Al koronavırýsty ótkergenderge naqty aıtylǵan. Tek 6 aıdan keıin ǵana vaktsına alýǵa bolady. Eger indet juqtyrdym-aý dep kúmándansańyz, PTR-test tapsyra alasyz», - dedi maman.
Medıtsına ǵylymdarynyń doktory zerthanalardyń antıdene mólsheri týraly beretin derekterine muqııat qaraý kerektigin aıtady.
«Bir test boıynsha referent kórsetkishi basqa test boıynsha kórsetkishke sáıkes kelmeı jatady. Qazir Qazaqstan naryǵynda 10 myńnan astam test-júıe bar. Al antıdene deńgeıi boıynsha resmı kórsetkishter joq. Sońǵy synaqtardyń nátıjelerine súıensek, antıdene kórsetkishi 50-60 -tan assa, qorǵanys deńgeıi bar bolǵany», – deıdi Elena Kovzel.
