Naýqas jary men balalaryn baǵyp júrgen áke qalaı aıaq astynan baspanaly boldy
QYZYLORDA. KAZINFORM — Maýsym aıynyń úshinshi jeksenbisi — Ákeler kúni qarsańynda Qyzylorda oblysynda tórtinshi márte oblystyq ákeler forýmy ótti.
«Áke tárbıesi — ulttyń rýhanı dińgegi» atty is-shara er azamattyń otbasy men qoǵamdaǵy mártebesin arttyrýǵa baǵyttalǵan. Forýmda otbasy qundylyqtaryn nasıhattap, óskeleń urpaq tárbıesine eleýli úles qosyp júrgen ákeler marapat tórinen kórindi.
Al qala turǵyny Jandos Kamalovqa úsh bólmeli páterdiń kilti tabystaldy. Kazinform tilshisimen suhbatta ol ózi úshin de, otbasy úshin de munyń kútpegen syı bolǵanyn jetkizdi.
— Kelinshegimmen otbasyn qurǵanyma segiz jyl boldy. Eki bala tárbıelep otyrmyz. Biraq áli kúnge páter jaldap turamyz. Kóship-qonyp júrýdiń azabyn ony basynan ótkergen adam jaqsy biledi. Uıymdastyrýshylar búgingi jıynǵa úlgili áke retinde shaqyryp, marapattaıtynyn aıtqan edi. Biraq «páter kilti tabystalady» degende ań-tań boldym. Balalarym da, áıelim de túsinbeı tur. Oılamaǵan jerden kópten kútken armanymyz oryndaldy, rasynda bul biz úshin tosynsyı boldy, — dedi Jandos Kamalov.
Keıipkerimiz — múmkindigi shekteýli jubaıyna jáne eki balasyna qamqor bolyp otyrǵan ardaqty áke. Ózi qaladaǵy saýda ortalyǵynda jumys isteıdi. Alaıda kúndelikti qarbalas arasynda bala tárbıesin nazardan qalt jibermeıdi.
— Qyzym 8, ulym 5 jasta. Ata-analar jınalysyna, olardyń is-sharalaryna ózim qatysyp turamyn. Balalarymnyń sabaq úlgerimi jaqsy, ekeýiniń ónerge de, bilimge de qyzyǵýshylyǵy basym. Úlgili áke bolýdyń eshqandaı erejesi joq. Bala tárbıesin biryńǵaı áıelge ysyryp salýǵa bolmaıdy. Bastysy, otbasy syılastyq pen aýyzbirshilikke qurylǵan bolsa, uzaqqa barady, — dedi ol.
Buǵan deıin habarlaǵanymyzdaı, búgingi forýmǵa «Ákeler odaǵy» respýblıkalyq qoǵamdyq birlestigi tóraǵasynyń orynbasary Bekdaıyr Kúzembaı, máslıhat depýtattary, zııaly qaýym ókilderi, aýdandardan kelgen, túrli salada tabysqa jetip, kásibi men eńbegi arqyly elge úlgi bolyp júrgen azamattar qatysty.
