Naýqas paraǵy elektrondy nusqada ǵana berilýi múmkin
ASTANA. KAZINFORM — Densaýlyq saqtaý mınıstrligi Eńbekke ýaqytsha jaramsyzdyqqa saraptama júrgizý, sondaı-aq eńbekke ýaqytsha jaramsyzdyq paraǵyn nemese anyqtamasyn berý qaǵıdalaryn bekitý týraly buıryqtyń jańa redaktsııasyn talqylaýǵa shyǵardy.
Jańa redaktsııa qoldanystaǵy buıryqtyń 2-taraýynyń 37-tarmaǵyndaǵy normany alyp tastaýdy kózdeıdi.
— Eńbekke ýaqytsha jaramsyzdyq paraǵynyń blankteri qatań eseptilik qujattary bolyp tabylady, — dep jazylǵan atalǵan normada.
Mınıstrlik mamandary mundaı ózgeris anyqtama berý jumystaryn ońtaılandyrý nıetinen týyndaǵanyn aıtady.
— Qazirgi tańda «Eńbekke ýaqytsha jaramsyzdyq paraǵyn berý» memlekettik qyzmeti elektrondy túrde de, qaǵaz túrinde de kórsetiledi. Mınıstrlik qaǵaz qujattardy paıdalanýdy ońtaılandyrý jáne azaıtý maqsatynda aýrýhana paraqtaryn jáne eńbekke ýaqytsha jaramsyzdyq týraly anyqtamany elektrondyq formatqa kóshirý boıynsha belsendi jumys júrgizýde. Bul ózgeristerdiń negizgi maqsaty azamattardyń medıtsınalyq mekemelermen jáne bılik organdarymen ózara is-qımylyn jeńildetý, sondaı-aq medıtsınalyq qyzmetterdiń yńǵaılylyǵy men qoljetimdiligin arttyrý bolyp tabylady. Bul ózgerister qoǵamda rezonans týdyrmaıdy nemese teris talqylaý qaýpin týdyrmaıdy, — dep jazylǵan baspasóz-relızde.
Sondaı-aq jańa redaktsııada eńbekke ýaqytsha jaramsyz bolýdyń alǵysharttary naqtylanǵan.
Olar: aýrý, jaraqat, sanatorıı-kýrorttyq uıymdarda emdelýge baılanysty ózge de jaǵdaılarǵa baılanysty eńbekke ýaqytsha jaramsyzdyq saraptamasyn júrgizý nátıjeleri karantınge baılanysty otbasynyń naýqas múshesine kútim jasaý, karantınge baılanysty júktilik, bosaný, protezdeý.
— Densaýlyq saqtaý sýbektisi patsıentke «Eńbekke ýaqytsha jaramsyzdyq paraǵyn berý» nemese «Eńbekke ýaqytsha jaramsyzdyq týraly anyqtama berý» memlekettik qyzmetterin «Elektrondyq úkimet» veb-portaly nemese aqparattandyrý obektileri (arnaýly mobıldi qosymshalar) arqyly elektrondyq túrde usynady. Jeke basyn kýálandyratyn qujat týraly málimetterdi elektrondyq túrde bergen kezde kórsetiletin qyzmetti berýshi tsıfrlyq qujattar servısinen iske asyrylǵan ıntegratsııa arqyly portalda tirkelgen paıdalanýshynyń uıaly baılanysynyń abonenttik nómiri arqyly bir rettik paroldi berý nemese portal habarlamasyna jaýap retinde qysqa mátindik habarlama jiberý arqyly usynylǵan qujat ıesiniń kelisimi bolǵan jaǵdaıda alady. Portal arqyly memlekettik qyzmet kórsetý merzimi — 30 mınýttan aspaıdy, — delingen buıryq jobasynda.
Qyzmetti arnaıy mobıldi qosymshalar arqyly alǵan jaǵdaıda elektrondy tsıfrlyq qoltańba talap etilmeıdi.
— Memlekettik qyzmetti kórsetý nátıjesin qyzmetti berýshi alýshyǵa elektrondyq qujat nysanynda «Jeke kabınetke» jiberedi, — dep jazylǵan jańa redaktsııada.
Qujat 3 aqpanǵa deıin talqylaýda bolady.
Eske salsaq, naýqas paraǵyn elektrondy túrde berý tetigi 2023 jyly qoldanysqa engen bolatyn.