Naýqas qyzyna qan quıǵyzbaı qoıǵan ana dinı uıym arqyly túsinik berdi
Buǵan deıin qyzdyń anasy Natalıa Sýsaevanyń Iegova kýágerleri dinı uıymynyń múshesi ekendigi, dinı nanym-senimine baılanysty qyzyna qan quıǵyzýdan bas tartqandyǵy habarlanǵan bolatyn.
Ortalyq málimetinshe, Ulttyq ana men bala ǵylymı ortalyǵy onkologııa bólimshesiniń meńgerýshisi Arman Ábenov anasynyń qandaı nıetpen ota jasatýdan bas tartqandyǵyn bilmeıtindigin aıtqan jáne dárigerler qyzdy Úndistanǵa emdeýge alyp ketkendigin bilmegen. Mamyr aıynda kishkentaı qyzdy operatsııaǵa daıyndap, sol úshin dárigerlerdiń arnaıy konsılıýmy da ótken. Biraq, operatsııa aldyndaǵy túnde anasy dárigerlerge aıtpastan qyzynyń jaǵdaıynyń aýyrlyǵyna, isik kóleminiń ulǵaıyp ketkendigine qaramastan ketip qalǵan. Buǵan qosa, dárigerler dinı uıym músheleri tarapynan medıtsına qyzmetkerlerine qysym bolǵandyǵyn da aıtýda. «Iegova kýágerleri hrıstıan qaýymy» jergilikti ókildiginiń músheleri qandy almastyratyn komponentterdi paıdalaný qajettigin aıtyp, tabandap turyp alǵan. Keıinnen búldirshiniń qaza tapqandyǵy belgili bolǵan edi.
Al dinı uıymnyń baspasóz qyzmetin ózderiniń tarapynan dárigerlerge eshqandaı qysym bolmaǵandyǵyn aıtýda. Sonymen qatar operatsııa aldyndaǵy túnde Natalıanyń dárigerlerge de, qyzdyń ákesine de aıtpaı balany alyp ketti degen aqparat jalǵan deıdi.
Atalǵan uıymnyń baspasó qyzmeti arqyly Natalıa Sýsaeva mynadaı túsinikteme bergen: «Dárigerler Vıktorııany qansyz hırýrgııa ádisin qoldaný arqyly emdeýdi odan ary jalǵastyrýǵa sheshim qabyldaı jatqandyqtan Úndistandaǵy Aster CMI Hospital aýrýhanasynyń hırýrg-gepatologıa, dáriger Sonal Astzannyń shaqyrýyn qabyl aldym.
Ol aýrýhananyń dárigerleri gepatoblastomdy emdeýde mol tájirıbeleri bar ekendikterin dáne qan qoldanbaı emdelýdiń tolyq kýrsyn ótkizýge bolatyndyǵyn aıtty. Úndistan konsýlynyń baǵa jetpes kómeginiń arqasynda biz Úndistanǵa medıtsınalyq vızany bir kúnniń ishinde aldyq. Qazaqstandaǵy dárigerlerdiń úlken jumys atqarǵandyǵyn baǵalaımyn. Biraq. Meniń sheshimim Vıktorııanyń múddesi úshin qabyldanǵan edi jáne oǵan emdelýge barynsha jaǵdaı jasaý nıetten týyndady».
Ol bul sheshimin bólimshe meńgerýshisi doktor Mustafınovke aıtqandyǵyn alǵa tartýda. Mustafın jáne emdeýshi dáriger Ótebalıev búldirshindi Aster CMI Hospital aýrýhanasyna jiberý týraly qujatqa jáne ushaqqa otyrǵyzý ruqsatyna qol qoıǵan.
«Men bul jaıynda burynǵy kúıeýime habarladym jáne ol Vıktorııany Úndistanǵa aparý úshin menim atyma senimhatty birden rásimdep berdi. Joǵary aıtylǵan áreketterdiń bári aqylǵa syıymdy ári zańdy bolǵandyǵyn, dárigerler men burynǵy kúıeýimniń kelisiminiń bar ekendigin eskere kele men jańalyqtardaǵy súıikti qyzymnyń qazasyna qatysty taraǵan jalǵan aqparattar saldarynan jan-jaqty qysymnyń astynda qalǵandaı sezinemin. Súıikti balamnyń ólimine qatty qaıǵyrýdamyn. Otbasy meg dostarym qoldaý kórsetýde», - dedi ol.
Aıta keterligi, bul dinı-nanym senimge baılanysty balanyń ólimine jol berilgen birinshi oqıǵa emes. Osyǵan deıin Shymkentte 9 aılyq bala aýrýhanada mert bolǵan edi. Óıtkeni, «Iegova kýágerleri» dinı uıymynyń músheleri bolǵan ata-analary sábıge qan quıýǵa ruqsat bermeı qoıǵan bolatyn.
Taıaýda Úkimet úıinde ótken brıfıngte Din isteri jáne azamattyq qoǵam mınıstri Nurlan Ermekbaev «Iegova kýágerleri» dinı uıymynyń Almatydaǵy jumysynyń toqtatylýy men anasynyń qyzy Vıktorııa Sýsaevaǵa qan quıýyna qarsy bolýyna qatysty pikir bildirgen bolatyn. «Bizdiń zańnamamyzǵa sáıkes Qazaqstan tirkelgen barlyq dinı birlestikter teń quqyly ári zań aldynda birdeı. «Iegova kýágerleri» dinı birlestigi Qazaqstanda resmı tirkelgen dinı birlestik sanalady. Sondyqtan ol zańnamaǵa sáıkes jumys isteıdi. Bizdiń ustanymymyz boıynsha, bul uıym ekstremıstik emes jáne búgingi kúni ony tolyqtaı jabý nemese oǵan Qazaqstanda qandaı da bir qysym jasaý jospary joq. Jalǵyz ǵana talap - zańnamany saqtaý. Almatydaǵy jaıtqa qatysty aıtar bolsam, sot sheshimimen «Iegova kýágerleri» dinı birlestiginiń jumysy toqtatyldy. Jabylǵan joq, úsh aıǵa toqtatyldy. Bul barynsha jeńil formasy. Ǵıbadat mekemelerinde terrorızmge qarsy qorǵanys erejesi saqtalmaǵan. Terrorızmge qarsy qorǵanys erejesin quqyq qorǵaý jáne kúshtik organdardyń arnaıy komıssııasy tekseredi. Olar bul erejelerdiń saqtalmaǵandyǵyn anyqtady. Uıǵarym engizildi. Alaıda, bul eskertýler merziminde joıylǵan joq. Sondyqtan materıaldar sotqa berildi jáne sot dinı birlestik qyzmetin úsh aıǵa toqtatý týraly sheshim qabyldady», - degen bolatyn.
Onyń aıtýynsha, eger bul eskertýler joıylatyn bolsa, onda dinı uıym óz qyzmetin jalǵastyra alady.
