Naýqas kóp, kezek az: endi ýchaskelik dárigerler úı aralap, em júrgizbeıdi
ASTANA. KAZINFORM — Endi ýchaskelik dárigerler naýqastyń shaqyrtýy boıynsha úı-úıdi aralap, em-shara jasamaıdy. Astanadaǵy № 5 qalalyq emhanasy jyl basynan beri dál osyndaı tártippen jumys isteıdi.
Jańa júıe alǵashynda pılottyq joba retinde iske qosylǵan. Emhana basshylyǵynyń aıtýynsha, bul ózgeris ýchaskelik dárigerlerdiń jumysyn jeńildetip, qabyldaý ýaqytyn 6 saǵatqa deıin uzartýǵa múmkindik berdi.
— Buryn dárigerler kúnine 4 saǵat qabyldaý jasap, qalǵan ýaqytynda úıge shaqyrtýlarǵa baratyn. Qazir olar tek emhanada qabyldaý júrgizedi. Buryn 4 saǵatta 16 adamdy kórse, endi 24 naýqasty qabyldaı alady, — deıdi № 5 qalalyq emhananyń dırektory Altynshash Tabýldına.
Al densaýlyǵyna baılanysty emhanaǵa óz betimen kele almaıtyn naýqastarǵa arnaıy mobıldi brıgada kómek kórsetedi.
— Eger naýqas habarlasyp, shaǵymyn aıtsa, aldymen jaǵdaıdy naqtylaımyz. Eger ol adam emhanaǵa kele alsa, ony osynda shaqyramyz. Sebebi qosymsha ÝDZ, analızder jasaý qajet bolýy da múmkin. Al naýqastyń kelýge múmkindigi bolmasa, mobıldi top burynǵy ýchaskelik dárigerler sııaqty úıine baryp, qajetti em-sharany júrgizedi, — deıdi Altynshash Tabýldına.
Emhanada shuǵyl jaǵdaılarǵa arnalǵan medıtsınalyq kómek kórsetý bólimshesi ashylǵan. Buǵan deıin bólek jumys istep kelgen fıltr, call-ortalyq jáne kómek kabınetteri osy bólimshe aıasynda biriktirilipti.
— Shuǵyl kómek kórsetý bólimshesin pılottyq rejımde bastadyq. Sodan beri dárigerdi úıge shaqyrý sany 15%-ǵa qysqardy. Bastapqyda kúnine 4–5 adam ǵana keletin. Qazir bul kórsetkish aıtarlyqtaı ósti. Artyq kezek kútpeı, jazylmaı-aq kómek alýǵa bolady, — deıdi emhana dırektory.
Jańadan ashylǵan bólimshe 12 saǵat boıy naýqastarǵa shuǵyl kómek kórsetedi.
— Biz tańǵy saǵat 8-den keshki 8-ge deıin jumys isteımiz. Senbi kúni de qyzmet etemiz. Kúnine 30-dan 60 adamǵa deıin qabyldaımyz. Jeńil travmalarmen, ınfektsııalyq jaralarmen, sozylmaly aýrýlardyń asqynýymen nemese túrli aýyrsynýmen naýqastar jıi keledi, — deıdi shuǵyl kómek kórsetý bóliminiń meńgerýshisi Qarlyǵash Qarnaqbaeva.
Naýqastar 57-63-20 nemese 57-63-62 nómirleri arqyly call-ortalyqqa habarlasa alady. Telefonǵa feldsher jaýap berip, jaǵdaıǵa saı áreket etedi.
— Eger naýqastyń jaǵdaıy shuǵyl bolsa, biraq ózdigimen júre alatyn bolsa jáne ol buıryqtaǵy jedel járdem kórsetiletin aýrýlar tizimine kirmese, biz ony shuǵyl kómek bólimshesine nemese fıltrge shaqyramyz. Munda dáriger tolyq qarap, qajet bolsa analızder men qosymsha tekserý júrgizedi. Keı jaǵdaılarda beıindi mamandar men protsedýralyq kabınet kómegine de júginemiz, — deıdi dáriger.
Qarlyǵash Qarnaqbaevanyń aıtýynsha, bólimshege keletin naýqastardyń úshten biri mindetti túrde protsedýralyq kabınet kómegine júginedi.
— Bólimshe qyzmetkerleri birin-biri almastyra alady. Eger protsedýralyq kabınetke maman jetispeı jatsa, call-ortalyqtyń mamandary kómekke keledi. Nemese fıltr kabınetiniń mamandary járdemdesedi. Kúnine qabyldanǵan naýqastardyń úshten biri protsedýralyq kabınette em qabyldaıdy, — deıdi ol.
Aıta keteıik, buǵan deıin endi emhanalarda meıirgerlerdiń naýqas qabyldaı alatynyn habarlaǵan edik.
Odan bólek, mınıstrlik bekitken jańa modýl boıynsha pedıatr-dárigerler balalardy tikeleı qabyldaıdy.